మైక్ పట్టుకుంటేనే వల్లమాలిన ప్రేమ ఒలకపోవడమే ఇండస్ట్రీ తీరు.. తేల్చి చెప్పిన ఎస్.వి. రంగారావు

SV Rangarao

మైక్ పట్టుకుంటే తాతగారిపై ప్రేమ పొంగుతుంది - కానీ ఎదురుపడితే పట్టించుకోరు అదే ఇండస్ట్రీ తీరు అని ఎస్.వి.రంగారావు మనవడు రంగారావు తెలియజేశారు. తాతగారిపేరునే మనవడికి తల్లిదండ్రులు పేరు పెట్టారు. ఎస్.వి. రంగారావు అంటే సినిమా రంగంలో తెలియంది కాదు. చెన్నైలో నివాసం వుంటున్న రంగారావును ఓ విలేకరి కదిలిస్తే అప్పటి సంగతులు తెలియజేశారు. 2005 లోనే సినిమా రంగంలోకి వచ్చా. కానీ అనుకున్నంత ఈజీగాదు అని అర్థమైంది అని అన్నారు.

తాతగారు ఎస్.వి. రంగారావు గురించి అందరికీ తెలిసిందే. ఎంతోమందిని సాయం చేశారు తాతగారు. మా తాతగారు బతికున్నటైంలో ఎంతోమంది ఇంటికి వచ్చేవారు. అందులో మా బంధువులు కొందరు ఇప్పుడు దర్శకులుగా వున్నారు. కానీ వారిని కలిసి నేను నటుడిగా చేయాలనుందంటే ఏవో మాటలు చెప్పి తప్పించుకుంటున్నారు. కొందరు చూద్దాం. చేద్దాం. టచ్ లో వుండూ అంటూ వాయిదా వేసేవారు. అయితే అందులో ఎన్. శంకర్ కి మా తాతగారితో అనుబంధం వుంది. ఆయనతో నా కోరిక చెప్పాను. కొంతకాలానికి జైబోలో తెలంగాణ సినిమాలో ఓ వేషం ఇచ్చారు. 

ఇక మా తాతగారి జయంతినాడు కానీ, వర్థంతి రోజునాడు కానీ సభ పెడితే మైక్ పట్టుకుని తాతగారిని ఇంద్రుడు చంద్రుడు అంటూ వాక్ చాతుర్యం చూపుతారు. అలా మాట్లాడిన వారిలో దర్శకులు చాలామంది వున్నారు. ఆ తర్వాత నేను వెళ్ళి వారి ఆఫీస్ లో వేషం గురించి అడిగి, మా తాతగారి పేరు చెబితే.. నిన్ననే ఒకరు వచ్చారు. ఆయన ఒరిజినల్లా, మీరు ఒరిజినల్లా.. తెలుసుకోండన్నారు. మరొకరు దగ్గరికి వెళితే, టచ్ లో వుంటూ అన్నారు. ఇంకొందరైతే తాతగారిలా వేషం వేసుకుని డైలాగ్ చెప్పగలవా? అని అడిగారు. ఇలా చాలామంది దర్శకులను కలిశాను. ఎక్కడా సరైన అవకాశం రాలేదు అని తన ఆవేదనను వ్యక్తం చేశారు. ఏది ఏమైనా ఇండస్ట్రీలో పెద్దదిక్కు లేనిదే అవకాశాలు లేవని స్పష్టంగా అర్థమైందని తెలియజేశారు.