తన పెళ్లిపై వస్తున్న వార్తలపై హీరోయిన్ శృతిహాసన్ వ్యంగ్యంగా స్పందించారు. క్రిస్మస్‌తో పాటు కొత్త సంవత్సర వేడుకలను తన బాయ్‌ఫ్రెండ్‌తో కలిసి జరుపుకున్నట్టు చెప్పారు. ఆ వేడుకల్లో స్నేహితులు, బాయ్‌ఫ్రెండ్ మైఖేల్‌తో కలిసి తీసుకున్న ఫోటోలనే తాను షేర్ చేసినట్టు వెల్లడించింది.
కాగా, లోకనాయకుడు కమల్ హాసన్ గారాలపట్టి శృతిహాసన్ ఆ మ‌ధ్య యూర‌ప్‌కి చెందిన మైఖేల్ కోర్సెల్‌తో చెట్టాప‌ట్టాలేసింది. ఆ తర్వాత తన తల్లి, సినీ నటి సారికకు పరిచయం చేసింది. అనంతరం బాయ్ ఫ్రెండ్‌తో కలిసి ఓ పెళ్ళిలో మెరిసింది.
వారితో లోకనాయకుడు కమల్ హాసన్ కూడా ఉండటంతో శృతి పెళ్లికి సంబంధించి పుకార్లు గుప్పుమన్నాయి. త్వ‌ర‌లోనే శృతి ఇంట పెళ్లి బాజాలు మోగనున్నాయి అని బాలీవుడ్ మీడియా జోస్యాలు చెప్పింది. అయితే వీరిద్ద‌రికి సంబంధించి కొన్నాళ్ళుగా ఎలాంటి వార్తలు రాక‌పోవ‌డం విశేషం.
ఈ నేపథ్యంలో శృతి లండ‌న్‌కి వెళ్లి తన బాయ్ ఫ్రెండ్‌తో కలిసి క్రిస్మ‌స్‌, నూత‌న సంవత్సర వేడుకలు జ‌రుపుకున్నారు. స్నేహితులు, మైఖేల్‌తో కలిసి కొన్ని ఫోటోలు దిగ‌గా వాటిని సోష‌ల్ మీడియాలో షేర్ చేసింది. దీంతో మ‌ళ్లీ శృతి పెళ్ళిపై ప్ర‌చారం మొద‌లైంది.
ఓ పత్రిక 2019లో శృతి తన బాయ్ ఫ్రెండ్‌ని చేసుకోబోతున్నార‌ని కథనం రాసింది. దీనిని రీ ట్వీట్ చేస్తూ .. 'నిజంగా ?.. ఇది నాకు వార్తే' అంటూ కాస్త వ్యంగ్యంగా స్పందించారు. హిందీలో 'బెహెన్‌ హోగీ తెరి' తర్వాత శృతి మ‌ళ్ళీ వెండితెర‌పై క‌నిపించ‌లేదు. ప్ర‌స్తుతం 'శ‌భాష్ నాయుడు' అనే చిత్రంలో తన తండ్రి కమల్ హాసన్‌తో కలిసి నటిస్తోంది.