శివకార్తికేయన్‌పై రజనీకాంత్ ప్రశంసలు.. యాక్షన్ హీరో అయిపోయావంటూ కితాబు

తమిళ హీరో శివకార్తికేయన్‌పై సూపర్ స్టార్ రజనీకాంత్ ప్రశంసల వర్షం కురిపించారు. ఇటీవల విడుదలైన మదరాసి చిత్రాన్ని చూసిన తర్వాత ఆయన ఈ మేరకు ప్రశంసలు కురిపించారు. ప్రముఖ దర్శకుడు ఏఆర్‌ మురుగదాస్‌ దర్శకత్వంలో శివకార్తికేయన్‌ నటించిన తాజాగా చిత్రం 'మదరాసి'. ఈ నెల 5వ తేదీన విడుదలై, ఆదరణ సొంతం చేసుకుంటోంది. తాజాగా ఈ సినిమా చూసిన రజనీ చిత్రబృందాన్ని అభినందించారు. ఈ విషయాన్ని తెలుపుతూ శివకార్తికేయన్‌ పోస్ట్ పెట్టారు. తాను దైవంగా భావించే తలైవా నుంచి ప్రశంసలు రావడం ఎంతో ఆనందంగా ఉందన్నారు. 

'సినిమా బాగుంది. నీ నటన మరో స్థాయిలో ఉంది. అద్భుతంగా నటించావు. మదరాసి నాకు చాలా నచ్చింది. నువ్వు యాక్షన్‌ హీరో అయిపోతావు. నా దీవెనలు నీకు ఎప్పుడూ ఉంటాయిట అంటూ తన ట్రేడ్‌మార్క్ చిరునవ్వుతో రజనీకాంత్‌ నన్ను ప్రశంసించారు. నా దైవం నుంచి అభినందనలు అందుకోవడం ఆనందంగా ఉంది' అని శివకార్తికేయన్ తన పోస్టులో రాసుకొచ్చారు. 

ఇక ఈ సినిమా విడుదలైన అనంతరం కోలీవుడ్‌ సినీ ప్రముఖులు దీన్ని ప్రశంసిస్తూ ఎక్స్‌ వేదికగా చిత్రబృందానికి అభినందనలు తెలిపారు. దర్శకుడు శంకర్‌, లింగుస్వామి 'మదరాసి'పై రివ్యూ ఇచ్చారు.