తమిళనాడు మాజీ సీఎం, దివంగత జయలలిత జీవిత కథ ఆధారంగా తలైవి సినిమా తెరకెక్కుతోంది. ఫిబ్రవరి 24వ తేదీన జయలలిత 72వ జయంతిని పురస్కరించుకుని.. ఈ సినిమా నుంచి మరో లుక్‌ను రిలీజ్ చేశారు. ఈ సినిమాను ఎ.ఎల్‌ విజయ్‌ దర్శకత్వం వహిస్తున్నాడు. తలైవి ఒకేసారి తెలుగు, తమిళం, హిందీ భాషల్లో తెరకెక్కుతోంది.
‘తలైవి’లో హిందీ నటి కంగనా రనౌత్‌ జయలలిత పాత్రలో అలరించనుండగా.. ఎమ్‌జీఆర్‌గా అరవింద స్వామి నటిస్తున్నాడు. శోభన్ బాబు పాత్రలో బెంగాలీ నటుడు జిషు సేన్ గుప్తా నటించనున్నాడు. జిషు సేన్ గుప్తా తాజాగా తెలుగులో విడుదలైన 'అశ్వత్థామ'లో విలన్‌గా అదరగొట్టాడు.
ప్రతిష్టాత్మకంగా నిర్మిస్తున్న ఈ సినిమాలో జయలలిత ఎలా టాప్ హీరోయిన్‌గా ఎదిగింది.. ఆ తర్వాత తమిళ రాజకీయాల్లో శక్తిమంతమైన నాయకురాలిగా.. మారిన విషయాలు చర్చించనున్నారు. ఇకపోతే.. ఈ సినిమాలో కంగన పాత్రకు సంబంధించి ఇప్పటికే విడుదల చేసిన రెండు లుక్స్‌కు మంచి ఆదరణ లభించింది. తాజాగా విడుదలైన లుక్‌లో యువ రాజకీయ నాయకురాలిగా జయలలిత అలరిస్తోంది. ఈ లుక్‌లో కంగన జయలలిత రూపంలో ఆకట్టుకుంటోంది.