సాధారణంగా సంక్రాంతి అంటేనే సినిమాల పండుగ. ఈ నానుడి మన తెలుగు నాట ఎప్పటి నుంచో వుంది. ఆ మూడు రోజుల పండుగను దృష్టిలో పెట్టుకుని పలు సినిమాలను రిలీజ్ చేస్తుండటం అనాదిగా వస్తుంది.
ముఖ్యంగా తమ సినిమాలు సంక్రాంతికి రిలీజ్ కావడాన్ని స్టార్ హీరోలు స్టేటస్‌గా.. సెంటిమెంటుగా ఫీలవుతుంటారు. ఆ పండక్కి రిలీజ్ అయ్యే సినిమాల కలెక్షన్లు కూడా గట్టిగానే ఉంటాయి. అందుకే, చాలామంది తమ సినిమాలను సంక్రాంతికి ప్లాన్ చేస్తుకుంటారు.
ఇక వచ్చే ఏడాది సంక్రాంతికి కూడా కొన్ని భారీ సినిమాలు రిలీజ్ అవుతున్నాయి. వీటిలో ప్రధానంగా చెప్పుకోవలసింది రాజమౌళి రూపొందిస్తున్న 'ఆర్ఆర్ఆర్'. ఎప్పటి నుంచో వాయిదా పడుతూ వస్తున్న ఈ చిత్రం సంక్రాంతికి ఓ వారం ముందుగానే వస్తోంది.
అలాగే, పవర్ స్టార్ పవన్ కళ్యాణ్ నటిస్తున్న 'భీమ్లా నాయక్', ప్రభాస్ నటిస్తున్న 'రాధేశ్యామ్', మహేశ్ నటిస్తున్న 'సర్కారు వారిపాట' కూడా సంక్రాంతికే ప్రేక్షకుల ముందుకు వస్తున్నాయి.
ఈ క్రమంలో అక్కినేని నాగార్జున కూడా సంక్రాంతి బరిలో నిలవడానికి సిద్ధమయ్యారట. కల్యాణ్ కృష్ణ దర్శకత్వంలో నాగార్జున - రమ్యకృష్ణ జంటగా 'బంగార్రాజు' సినిమాలో నటిస్తున్నారు. ఈ చిత్రాన్ని కూడా సంక్రాంతికి రిలీజ్ చేయడానికి ప్లాన్ చేస్తున్నట్టు సమాచారం.
ఇది గతంలో నాగార్జున నటించిన 'సోగ్గాడే చిన్ని నాయనా' చిత్రానికి సీక్వెల్‌గా రూపొందుతున్న సంగతి విదితమే. ఆ చిత్రం కూడా అప్పట్లో సంక్రాంతికే విడుదలై మంచి విజయాన్ని సాధించింది. ఆ సెంటిమెంటుతోనే ఇప్పుడు దీనిని కూడా పెద్ద పండక్కి విడుదల చేయాలని చిత్ర బృందం భావిస్తుంది.