ఉత్తరప్రదేశ్ మాజీ ముఖ్యమంత్రి, సమాజ్‌వాదీ పార్టీ మాజీ అధ్యక్షుడు ములాయం సింగ్ యాదవ్ కోడలు అపర్ణ యాదవ్ సూపర్బ్‌గా డ్యాన్స్ వేశారు. ముఖ్యంగా, సెన్సార్‌కు ముందే వివాదాల సుడిగుండంలో చిక్కుకున్న 'పద్మావతి'
ఉత్తరప్రదేశ్ మాజీ ముఖ్యమంత్రి, సమాజ్‌వాదీ పార్టీ మాజీ అధ్యక్షుడు ములాయం సింగ్ యాదవ్ కోడలు అపర్ణ యాదవ్ సూపర్బ్‌గా డ్యాన్స్ వేశారు. ముఖ్యంగా, సెన్సార్‌కు ముందే వివాదాల సుడిగుండంలో చిక్కుకున్న 'పద్మావతి' చిత్రంలోని ఓ పాటకు ఆమె అద్భుతంగా డ్యాన్స్ చేశారు. యూపీ రాజధాని లక్నోలో జరిగిన ఓ కార్యక్రమంలో 'గూమర్' సాంగ్‌కు దీపికా పదుకొనేను తీసిపోకుండా అపర్ణ స్టెప్పులేశారు. అపర్ణ డ్యాన్స్ వీడియో సామాజిక మాధ్యమాలలో వైరల్‌గా మారింది.
ఇది వివాదంగా మారింది. ఆ వెంటనే ఆమెకు సోషల్ మీడియా వేదికగా బెదిరింపులు వచ్చాయి. ములాయం కుటుంబానికి చెందిన కోడలు ఇలా చేయడం సరికాదని రాజ్‌పుత్ కర్ణిసేన వర్గీయులు మండిపడుతున్నారు. ఏ పాటనైతే తాము వ్యతిరేకిస్తున్నామో ఆ పాటపై అపర్ణ డాన్స్ చేయడం ద్వారా తమను అవమానపరిచారని వారు ఆగ్రహం వ్యక్తం చేస్తున్నారు.
కాగా, దీపికా పదుకొనే, రణ్‌వీర్ సింగ్, షాహిద్ కపూర్ నటించి, బాలీవుడు దర్శకుడు సంజయ్ లీలా భన్సాలీ తెరకెక్కించిన ఈ చిత్రం వివాదాస్పదంగా మారిన విషయం తెలిసిందే. ఈ చిత్రానికి సెన్సార్ బోర్డు కూడా ఇంకా సర్టిఫికేట్ మంజూరు చేయని విషయం తెల్సిందే. అలాగే, ఉత్తరభారతంలోని బీజేపీ పాలిత రాష్ట్రాల ముఖ్యమంత్రులు సైతం ఈ చిత్రం తమతమ రాష్ట్రాల్లో విడుదల కాకుండా నిషేధం విధించారు.