మణిరత్నం దర్శకత్వంలో వచ్చిన చిత్రం "పొన్నియిన్ సెల్వన్". గత నెల 30వ తేదీన ప్రపచం వ్యాప్తంగా పాన్ ఇండియాగా విడుదలైంది. ఇతర భాషల్లో టాక్ ఎలా ఉన్నప్పటికీ తమిళంలో మాత్రం బ్లాక్‌బస్టర్ హిట్ కొట్టింది. కలెక్షన్ల పరంగా కనకవర్షం కురిపిస్తుంది. ఫలితంగా ఈ చిత్రం రూ.450 కోట్ల వసూళ్లను రాబట్టేందుకు చేరువైంది.
ఈ వారం చివరి నాటికి ఈ హిస్టారికల్ ఫిక్షన్ సినిమా రూ.450 కోట్ల క్లబ్‌లో చేరుతుందని ట్రేడ్ నిపుణులు వెల్లడిస్తున్నారు. "పీఎస్1" తమిళ వెర్షన్.. భారత్‌తో పాటు అంతర్జాతీయ సర్క్యూట్‌లో సత్తా చాటుతోంది. కానీ, ఇతర భాషల్లో మాత్రం పెద్ద స్పందన కనిపించడం లేదు. అయినా కూడా ఈ చిత్రం బాక్సాఫీస్ రికార్డులను బద్దలు కొడుతూనే ఉంది.
చిత్రం విడుదలైన రెండు వారాల్లోనే ప్రపంచవ్యాప్తంగా రూ.400 కోట్ల మార్క్‌ను అధిగమించింది. దాంతో, ఈ రెండు వారాల్లో వచ్చిన సినిమాల్లో పొన్నియన్ సెల్వన్ బాక్సాఫీస్ వద్ద స్పష్టమైన విజేతగా నిలిచింది.
తొలి భాగానికి పెట్టిన పెట్టుబడులను చిత్ర నిర్మాతలు రికవరీ చేసినట్లు సమాచారం. రెండు పార్టులను దాదాపు ఒకే స్ట్రెచ్‌లో చిత్రీకరించారు. ఈ లెక్కన రెండో పార్టుకు వచ్చే వసూళ్లతో నిర్మాతలకు లాభాల పంట పడనుంది.
మరోవైపు ఈ చిత్రానికి జర్మనీలోనూ అద్భుత స్పందన వస్తోందని ట్రేడ్ అనలిస్ట్ రమేష్ బాలా తెలిపారు. జర్మనీ బాక్స్ ఆఫీస్ వద్ద పది రోజుల్లో నిర్దేశిత థియేటర్లలో ఈ చిత్రం 1.25 కోట్ల వసూళ్లు రాబట్టిందని ట్వీట్ చేశారు. ఈ సినిమా రెండో భాగం ఆరు నుంచి తొమ్మిది నెలల్లో థియేటర్లలోకి రానుంది.