తెలుగు సినీ నటుల సంఘం మూవీ ఆర్టిస్ట్స్ అసోసియేషన్ (మా)కు తక్షణం ఎన్నికలు నిర్వహించాలంటూ మెగాస్టార్ చిరంజీవి కోరారు. ఈ మేరకు ఆయన మా క్రమశిక్షణా సంఘం అధ్యక్షుడు, సీనియర్ నటుడు కృష్టంరాజుకు లేఖ రాశారు. చిరు లేఖ టాలీవుడ్‌లో పెద్ద సంచలనం రేపింది.
ముఖ్యంగా, ఈ లేఖపై పోటీలో ఉన్న వారు తీవ్ర వ్యాఖ్య‌లు చేస్తుండ‌డం చ‌ర్చ‌నీయాంశంగా మారింది. ఈ నేప‌థ్యంలో త్వరలో ఎన్నికలు జరిపించాలని 'మా' క్రమశిక్షణ కమిటీ ఛైర్మన్, సీనియర్ నటుడు కృష్ణంరాజుకు చిరంజీవి రాసిన లేఖకు మ‌ద్ద‌తు తెలిపేలా 113 మంది మా సభ్యులు స్పందించారు.
కృష్ణంరాజ‌కు చిరంజీవి లేఖ రాసిన 24 గంటల్లో ఆయన బాటలోనే న‌డుస్తూ 113 మంది మా సభ్యులు కూడా కృష్ణంరాజుకు లేఖలు రాశారు. త్వరగా ఎన్నికలు నిర్వహించాలని కోరారు. ఈ లేఖ‌ల‌పై కృష్ణంరాజు స్పందించాల్సి ఉంది. ఎన్నికలు ఎప్పుడు జరపాలనే విషయంపై తుది నిర్ణయాన్ని సభ్యులు కృష్ణంరాజుకే వదిలేసినట్లు తెలుస్తోంది.