సీనియర్ హీరో అక్కినేని నాగార్జున - దర్శకుడు కల్యాణ్ కృష్ణ కాంబోలో తెరక్కనున్న చిత్రం 'బంగార్రాజు'. ఈ పాటికే నాగార్జున ఈ సినిమా పూర్తిచేయవలసి ఉంది. కానీ కొన్ని కారణాల వలన ఎప్పటికప్పుడు ఈ ప్రాజెక్టు వాయిదా పడుతూ వచ్చింది.
వచ్చే నెల 16వ తేదీ నుంచి ఈ సినిమా రెగ్యులర్ షూటింగుకి వెళ్లాలనే ఒక నిర్ణయానికి వచ్చారు. ప్రస్తుతం అందుకు సంబంధించిన సన్నాహాలు జరుగుతున్నాయి. ఈ సినిమాలో నాగార్జున సరసన నాయికగా రమ్యకృష్ణ కనిపించనున్నారు.
మరోవైపు, నాగచైతన్య పాత్ర కూడా చాలా ఇంట్రెస్టింగ్గా ఉండనుంది. ఈ పాత్రకి జోడీగా కృతి శెట్టిని ఎంపిక చేయనున్నట్టు వార్తలు వచ్చాయి. ఆమె ఎంపిక ఖరారైపోయిందని తాజాగా అంటున్నారు.
గ్రామీణ వాతావరణంలోనే ఈ కథ నడవనుంది. 'సంక్రాంతి' బరిలోనే ఈ సినిమాను నిలపాలనే ఉద్దేశంతో నాగ్ ఉన్నాడని అంటున్నారు. నాగార్జున - కల్యాణ్ కృష్ణ కాంబినేషన్లో వచ్చిన 'సోగ్గాడే చిన్నినాయనా' సినిమా విజయాన్ని సాధించి విషయం తెల్సిందే. నాగార్జున ద్విపాత్రాభినయం చేయగా, ఇందులో రమ్యకృష్ణతో పాటు లావణ్య త్రిపాఠి నటించారు.