సంక్రాంతి బరిలో పెద్ద సినిమాలతో పోటీ పడి మరీ అద్భుత విజయాన్ని సాధించిన సినిమా "ఎఫ్2" ఇప్పుడు రూ.వంద కోట్లకు క్లబ్‌కు చేరువకు పరుగులు తీస్తోంది. ఒకవైపు కలెక్షన్ల హవా కొనసాగుతుండగా మరోవైపు ఈ సినిమాను ఇతర భాషల్లో రీమేక్ చేసేందుకు చకచకా ఏర్పాట్లు జరిగిపోతున్నాయి. ఈ విషయాన్ని చిత్ర నిర్మాత దిల్ రాజు వెల్లడించారు.
ఈ సినిమాను తమిళ, హిందీ భాషల్లో రీమేక్ చేసేందుకు ప్రయత్నాలు జరుగుతున్నాయని, త్వరలోనే అన్ని విషయాలు వెల్లడిస్తానని చెప్పుకొచ్చారు. ఈ సినిమాను తానే హిందీలో నిర్మించే అవకాశాలు ఉన్నాయని, కాకుంటే తెలుగులో ఈ ఏడాది చేయాల్సిన సినిమాలు చాలానే ఉన్నందున నిర్మాణ భాగస్వామిగా ఉండటమే శ్రేయస్కరం అనే ఆలోచనలో ఉన్నట్లు ఆయన పేర్కొన్నారు. ముంబైలో ఈ సినిమా రీమేక్‌కు సంబంధించి చర్చలు జరుగుతున్నాయని, ఎవరెవరు నటిస్తున్నారనే విషయాన్ని త్వరలోనే వెల్లడిస్తామని చెప్పారు.