విక్టరీ వెంకటేష్, మెగా ప్రిన్స్ వరుణ్ తేజ్ కాంబినేషన్‌లో అనిల్ రావిపూడి దర్శకత్వం వహించిన మల్టీస్టారర్ మూవీ "ఎఫ్2" (ఫన్ అండ్ ఫ్రస్ట్రేషన్). ఈ చిత్రం సంక్రాంతి పండుగకు విడుదలై బంపర్ హిట్ కొట్టేసింది. ఈ చిత్రం విడుదలైన తొలి ఆట మొదలుకుని భారీ వసూళ్లు రాబడుతోంది. ఈ చిత్రం విడుదలై 25 రోజులు గడిచినా ఇప్పటికీ పలు థియేటర్ల ముందు హౌస్‌ఫుల్ కలెక్షన్లు దర్శనమిస్తున్నాయి.
అంతేకాకుండా, రూ.30 కోట్ల ప్రీరిలీజ్ బిజినెస్ చేసిన ఎఫ్2... ఇప్పటివరకు రూ.75 కోట్ల మేరకు షేర్‌ను రాబట్టింది. ఈ పరిస్థితుల్లో మరో రేర్ ఫీట్‌ను సాధించింది. ఒక్క కృష్ణా జిల్లాలోనే ఏకంగా రూ.5 కోట్ల షేర్‌ను కలెక్ట్ చేసిన ఆరో చిత్రంగా అరుదైన రికార్డును సొంతం చేసుకుంది. పూర్తి హాస్యభరితంగా నిర్మించిన ఈ చిత్రంలో హీరోయిన్లుగా తమన్నా, మెహ్రీన్‌లు నటిస్తే, హాస్య నటుడు రాజేంద్ర ప్రసాద్ కీలకమైన పాత్రను పోషించారు. ఈ చిత్రాన్ని ప్రముఖ నిర్మాత దిల్ రాజు నిర్మించారు.
కాగా, కృష్ణా జిల్లాలో ఇప్పటివరకు రూ.5 కోట్ల షేర్‌ను రాబట్టిన చిత్రాల జాబితాను పరిశీలిస్తే, బాహుబలి-2 రూ.14 కోట్లు, రంగస్థలం రూ.7 కోట్లు, బాహుబలి-1 రూ.6.86 కోట్లు, భరత్ అనే నేను రూ.5.80 కోట్లు, ఖైదీ నంబర్ 150 రూ.5.75 కోట్లు, ఎఫ్2 రూ.5 కోట్లు చొప్పున షేర్ రాబట్టింది.