దేవర సెప్టెంబర్ 27న ప్రపంచ వ్యాప్తంగా థియేటర్లలో విడుదల కానుంది. కొరటాల శివ దర్శకత్వంలో జూనియర్ ఎన్టీఆర్, సైఫ్ అలీ ఖాన్, జాన్వీ కపూర్ నటించిన దేవర దేశంలో అడ్వాన్స్ బుకింగ్స్‌తో బాక్సాఫీస్ వద్ద రికార్డు సృష్టిస్తోంది. సెప్టెంబర్ 24, 2024 సాయంత్రం 6 గంటల సమయానికి ఈ సినిమా అడ్వాన్స్ బుకింగ్.. సినిమా రిలీజ్ రోజుకి రూ. 16-17 కోట్లకు పైగా వసూలు చేసింది. బాలీవుడ్ నటులు ఇందులో నటించడంతో పాటు ఆర్ఆర్ఆర్ తర్వాత ఎన్టీఆర్ క్రేజ్ కారణంగా ఈ మొత్తం వసూలైందని టాక్ వస్తోంది.
ఇక ప్రపంచవ్యాప్తంగా, అడ్వాన్స్ బుకింగ్‌లు ప్రారంభ రోజుకు రూ. 45-50 కోట్లకు చేరువలో ఉన్నాయి. నార్త్ ఇండియాలో బాహుబలి, కేజీఎఫ్ బ్రేకవుట్ విజయాన్ని దేవర ఫాలో అవుతాడని అంచనాలు ఉన్నాయి.
ఈ చిత్ర సంగీతానికి సానుకూల స్పందన లభించగా, ట్రైలర్‌లకు మిశ్రమ సమీక్షలు వచ్చాయి. ఈ సినిమా ప్రేక్షకులకు బాగా కనెక్ట్ అయితే, ఇది భారీ ఓపెనింగ్‌ను చూడవచ్చు. ప్రపంచవ్యాప్తంగా రూ. 100 కోట్లు దాటే అవకాశం ఉంది. ఇకపోతే.. అభిమానుల తాకిడి తట్టుకోలేక ప్రీరిలీజ్ ఈవెంటును కేన్సిల్ చేయడం ఈ సినిమాపై ఉన్న క్రేజ్ కి ఒక నిదర్శనంగా భావించాలి.
అలాగే విడుదలకు ముందే దేవర రికార్డులు సృష్టిస్తోంది. తాజాగా ఓవర్సీస్‌లో అరుదైన రికార్డును తార‌క్ త‌న ఖాతాలో వేసుకున్నాడు. నార్త్ అమెరికాలో దేవర ప్రీ సేల్స్‌లో 2 మిలియన్‌ డాలర్ల మార్క్‌ను దాటింది. దీంతో వరుసగా రెండు సినిమాలతో ఈ ఫిగర్‌ను దాటిన తొలి భారతీయ హీరోగా అరుదైన ఘ‌న‌త‌ను ఎన్టీఆర్ సొంతం చేసుకున్నాడు.
ఇక అమెరికాలో దేవర ప్రీమియర్స్ ఒక‌రోజు ముందుగానే ప్రారంభం కానున్నాయి. అక్క‌డ సెప్టెంబర్ 26న మూవీ ప్రీమియర్స్ ప‌డ‌నున్నాయి.