రూ.376.14 కోట్లు వసూలు చేసిన అమీర్ ఖాన్ దంగల్.. వినోదపు పన్ను కట్..

అమీర్ ఖాన్ నటించిన దంగల్ సరికొత్త రికార్డు సృష్టించింది. ఈ సినిమా కలెక్షన్ల పరంగా దుమ్మురేపింది. ఏకంగా రూ.376.14 కోట్లు వసూలు చేసినట్లు సినీ విశ్లేషకుడు తరుణ్‌ ఆదర్శ్‌ పేర్కొన్నారు. మల్లయోధుడు మహవీర్‌

అమీర్ ఖాన్ నటించిన దంగల్ సరికొత్త రికార్డు సృష్టించింది. ఈ సినిమా కలెక్షన్ల పరంగా దుమ్మురేపింది. ఏకంగా రూ.376.14 కోట్లు వసూలు చేసినట్లు సినీ విశ్లేషకుడు తరుణ్‌ ఆదర్శ్‌ పేర్కొన్నారు. మల్లయోధుడు మహవీర్‌సింగ్‌ ఫొగాట్‌ జీవితగాథ ఆధారంగా నితీశ్‌ తివారీ దీన్ని తెరకెక్కించిన సంగతి తెలిసిందే. ఈ నేపథ్యంలో తొలిరోజు నుంచే బాక్సాఫీస్‌ వద్ద మంచి టాక్‌ను తెచ్చుకుంది. 

ఇక విడుదలైన రెండో రోజే రూ.50కోట్లు వసూలు చేసింది. మూడు రోజుల్లో రూ.100కోట్లు.. ఎనిమిది రోజుల్లో రూ.200కోట్లు.. 13రోజుల్లో రూ.300కోట్లు.. 29 రోజుల్లో రూ.375 కోట్లను 'దంగల్‌' వసూలు చేసింది. ఇక ఓవర్సీస్‌లోనూ దంగల్‌ కలెక్షన్ల పరంపర కొనసాగిందని తరుణ్ ఆదర్శ్ తెలిపారు. 

ఈ నేపథ్యంలో ప్రపంచ వ్యాప్తంగా జనవరి 20 నాటికి 29.04 మిలియన్ డాలర్లు (రూ.197.70 కోట్లు) వసూలు చేయడం విశేషం. ఒక్క యూఎస్‌ఏ, కెనడాలలో 12 మిలియన్ల కలెక్షన్లు రాబట్టింది. ఇదిలా ఉంటే.. దంగల్ చిత్రానికి మధ్యప్రదేశ్‌ రాష్ట్రంలో వినోదపు పన్నును మినహాయిస్తున్నట్లు ఆ రాష్ట్ర ముఖ్యమంత్రి శివరాజ్‌ సింగ్‌ చౌహాన్‌ ప్రకటించారు. ఈ చిత్రాన్ని శుక్రవారం రాత్రి ఆయన తన సతీమణి సాధనతో కలిసి వీక్షించారు. ఈ సందర్భంగా ఎంపీ ప్రభుత్వం దంగల్‌ చిత్రానికి వినోదపు పన్ను మినహాయిస్తుందన్నారు.

దీంతో పాటు రెజ్లింగ్‌ను ప్రోత్సహించేందుకు మధ్యప్రదేశ్‌లో ప్రత్యేకంగా అకాడమీని ఏర్పాటు చేస్తామని కూడా చెప్పారు. దీంతో 'జై గంగాజల్‌', 'నీర్జా', 'మర్దాని' చిత్రాల తర్వాత వినోదపు పన్ను మినహాయింపు ప్రకటించిన నాలుగో చిత్రంగా దంగల్‌ నిలిచింది.