బిగ్ బాస్ సీజన్ 7 ఎప్పుడెప్పుడు ప్రారంభం అవుతుందా అంటూ సినీ ప్రేక్షకులు ఎదురుచూస్తున్నారు. ఈ నేపథ్యంలో స్టార్ మా చానల్లో ప్రసారమయ్యే ఈ భారీ రియాలిటీ షో ఊహలకు అందని రీతిలో వుంటుందని షో యాంకర్, నటుడు నాగార్జున చెప్పారు.
గత కొన్ని సీజన్లుగా బిగ్ బాస్ రేటింగ్ తగ్గినప్పటికీ, ఈసారి ప్రోమోలు చూస్తే సరికొత్త బిగ్ బాస్ షోను చూడవచ్చునని నమ్మకం కలుగుతుంది. హోస్ట్ నాగార్జున కూడా అదే చెబుతున్నారు. బిగ్ బాస్ తెలుగు సీజన్-7 మీ అంచనాలకు అందని విధంగా ఉంటుందని నాగ్ ప్రోమోలో తెలియజేశారు. ఇది అంతం కాదు, ఆరంభం అంటూ చిటికేసి మరీ చెప్పారు.
అంతా ఉల్టా పుల్టా అంటూ ఆసక్తి పెంచే ప్రయత్నం చేశారు. ఈ మేరకు స్టార్ మా చానల్ బిగ్ బాస్-7 తాజా ప్రోమోను విడుదల చేసింది. ఈ ప్రోమోలో చిన్న స్కిట్‌ను కూడా ప్రదర్శించారు.
మరోవైపు మరికొద్ది రోజుల్లో తెలుగు బిగ్ బాస్ 7 షురూ కానున్న నేపథ్యంలో ఈ షోకి సంబంధించిన ఎన్నో విషయాలు వైరల్ అవుతున్నాయి. ఈ ఏడో సీజన్‌లో పాల్గొనే కంటెస్టెంట్స్ వీళ్లే అంటూ.. దాదాపుగా ఖరారు అయ్యినట్లు ఓ వార్త సోషల్ మీడియాలో వైరల్‌గా మారింది.
కార్తీక దీపం శోభా శెట్టి, విష్ణు ప్రియ, బేబీ మూవీ ఫేమ్ వైష్ణవి, నవ్య స్వామి, సురేఖావాణి, ప్రభాకర్ పేర్లు ఇప్పటికైతే బలంగా వినిపిస్తున్నాయి. అయితే ఈ సారి బిగ్ బాస్ వేదికపై ఎంటర్టైన్మెంట్ పీక్స్‌లో ఉండేలా సన్నాహాలు చేస్తున్నారట. ఈ షోలో సురేఖా వాణి కూతురు సుప్రితను కూడా రంగంలోకి దించుతున్నారని తెలుస్తోంది.