కన్నడ నటి, మైసూరు మాజీ ఎంపీ రమ్య "హాస్టల్ హుడుగారు బెకగిద్దరే" సినిమాలోని తన సన్నివేశాలను తొలగించాలని కోరుతూ కోర్టును ఆశ్రయించారు. తన అనుమతి లేకుండా వాటిని ఉపయోగించారని ఆమె ఆరోపించారు. తన ఫుటేజ్‌ను సినిమా ట్రైలర్, ప్రధాన ఫీచర్‌లో తనకు ముందస్తు అనుమతి లేకుండా చేర్చారని రమ్య మంగళవారం కమర్షియల్ కోర్టులో పిటిషన్ దాఖలు చేశారు.
తన వీడియోలను సినిమా నుండి తొలగించాలని చిత్రనిర్మాతలను ఆదేశించాలని రమ్య కోర్టును అభ్యర్థించారు. ఇంకా కోటి రూపాయల పరిహారం డిమాండ్ చేశారు. ఇందులోని తన క్లిప్‌లను తొలగించాలని చిత్ర నిర్మాతలకు అనేకసార్లు అభ్యర్థనలు చేసినప్పటికీ, ఎటువంటి చర్య తీసుకోలేదని ఆమె పేర్కొన్నారు.
ఇంకా ఈ వీడియోలను వెంటనే తొలగిస్తే తాను కేసును ఉపసంహరించుకుంటానని ఆమె సూచించారు. నితిన్ కృష్ణమూర్తి దర్శకత్వం వహించిన "హాస్టల్ హుడుగారు బెకగిద్దరే" ఒక బ్లాక్ కామెడీ-డ్రామా చిత్రం. గతంలో, రమ్య సినిమా విడుదలను ఆపాలని కోరారు. కానీ ఆమె పిటిషన్ కొట్టివేయబడింది. తద్వారా సినిమా సజావుగా విడుదలైంది.