నితిన్ - సమంత జంటగా నటించిన చిత్రం "అ.. ఆ.. (అనసూయ రామలింగం వర్సెస్ ఆనంద్ విహారి)". మాటల మాంత్రికుడు త్రివిక్రమ్ శ్రీనివాస్ ఈ చిత్రానికి దర్శకత్వం వహించాడు. మిక్కీ జె. మేయర్ ఈ చిత్రానికి సంగీతం సమకూర్చారు. ఇందులో నితిన్‌కి చెల్లెలుగా ప్రముఖ హీరోయిన్ అనన్య నటించింది. సన్ ఆఫ్ సత్యమూర్తి తర్వాత త్రివిక్రమ్ శ్రీనివాస్ తెరకెక్కించిన ఈ చిత్రంపై భారీ అంచనాలే ఉన్నాయి. అయితే మంచి అంచనాలతో గురువారం ప్రేక్షకుల ముందుకొచ్చింది ఇప్పుడు ఈ చిత్ర రివ్యూను చూద్ధాం.
నటీనటులు : నితిన్, సమంత, అనుపమ పరమేశ్వరన్, అనన్య
దర్శకత్వం: త్రివిక్రమ్ శ్రీనివాస్
కథ: త్రివిక్రమ్ శ్రీనివాస్
నిర్మాణం: హారిక అండ్ హారిక క్రియేషన్స్
నిర్మాత: ఎస్. రాధాకృష్ణ
సంగీతం: మిక్కీ జె. మేయర్
సినిమా నిడివి: 154 నిముషాలు
రిలీజ్ డేట్: 02-06-2016
కథ : ఈ సినిమాలో ఆనంద్(నితిన్) ఒక మిడిల్ క్లాస్ కుటుంబానికి చెందిన పల్లెటూరి అబ్బాయిగా నటించాడు. అనసూయ రామలింగం (సమంత) కోటీశ్వరుని కూతురిగా నటించింది. అనసూయ రామలింగం (సమంత), ఆనంద్ విహారి (నితిన్)లు ఇద్దరు ట్రైన్‌లో కలుసుకుంటారు. ట్రైన్‌లో కలుసుకున్న వీరిద్దరూ మొదటి చూపులోనే ఇష్టపడతారు. కానీ వారి ప్రేమను ఒకరికొకరు బయటకు చెప్పుకోరు. కాగా ఈ నేపథ్యంలో ఆనంద్ విహారి(నితిన్) కుటుంబ సభ్యులు అతనికి వేరే అమ్మాయి(అనుపమ)తో పెళ్ళి కుదురుస్తారు. అయితే ఒకరినొకరు ప్రేమించుకున్న నితిన్, సమంతలు మళ్లీ కలుస్తారా? లేక తన కుటుంబం కోసం నితిన్ తన ప్రేమను త్యాగం చేసాడా? అనేది అసలు స్టోరీ.
ఈ సినిమాలో నితిన్, సమంత, అనుపమ పరమేశ్వరన్‌ల నటన సినిమాకి హైలైట్ అని చెప్పడంలో ఎలాంటి సందేహం లేదు. నితిన్, సమంత, మధ్య లవ్ సీన్స్‌లో కెమిస్ట్రీ బాగా వర్కౌట్ అయ్యింది. ఈ సినిమాలో నటించిన నటీనటులు రావు రమేష్, నదియా, నరేష్, పోసాని కృష్ణ మురళి, బ్రహ్మానందం, అవసరాల శ్రీనివాస్, అలీ తమదైన శైలిలో నటించి అందరిని ఆకట్టుకున్నారు.
విశ్లేషణ:
అ..ఆ.. సినిమా ఓ మంచి ఫ్యామిలీ ఎంటర్టైనర్. సినిమా మొదలైన దగ్గర నుండి చివరి వరకు మనసుకు హత్తుకునే సన్నివేశాలతో త్రివిక్రమ్ తనదైన శైలిలో ప్రేక్షకులను కట్టిపడేశాడు. సమంత అల్లరి చేష్టలు, నితిన్ యాక్టింగ్ ఎక్కడా ప్రేక్షకులని బోర్ కొట్టించలేదు. కుటుంబసమేతంగా అందరూ చూడదగిన చిత్రం. ఈ సినిమాతో త్రివిక్రమ్ మరో హిట్ కొట్టినట్టే.