అప్పటివరకు శంకర్ 'రోబో' చిత్రం ఇండస్ట్రీలోనే హైటైల్‌. కానీ బాహుబలి వచ్చాక.. ఇండియాలోనే సినిమా చరిత్ర మారిపోయింది. మొదటి నుంచి రోబో సీక్వెల్‌ తీయడానికి సిద్ధమైన శంకర్ ఈసారి చాలా కొత్తగా చూపించే ప్రయత్నం చేస్తున్నారు. 2010లో విడుదలైన ఈ గ్రాఫికల్‌ వండర్‌కు ప్రస్తుతం సీక్వెల్‌ రూపొందించే విషయమై దర్శకుడు శంకర్ కసరత్తులు చేస్తోన్న విషయం తెలిసిందే.
ప్రస్తుతం ఈ సినిమాను నిర్మించేందుకు లండన్‌కు చెందిన ఓ ప్రముఖ నిర్మాత ముందుకొచ్చారని తెలుస్తోంది. సుమారు 240 కోట్ల బడ్జెట్‌ అంచనాతో తెరకెక్కనున్న ఈ సినిమాకు ఇచ్చేందుకు ఇప్పటికే పలు పెద్ద నిర్మాణ సంస్థలు సైతం ముందుకు వచ్చాయి. ఇక ఇప్పుడు ఏకంగా ఫారిన్‌ ప్రొడ్యూసర్స్‌ కూడా రావడం ఆసక్తికరంగా కనిపిస్తోంది.
3డీలో అధునాతన సాంకేతిక పరిజ్ఞానంతో రూపొందనున్న ఈ సినిమాకు ఇంటర్నేషనల్‌ ఫీల్‌ తెచ్చేందుకు దర్శకుడు శంకర్, ఈ సినిమాలో విలన్‌గా నటించేందుకు హాలీవుడ్‌ నటుడిని ఒప్పించనున్నట్లు సమాచారం. డిసెంబర్‌లో ఈ సినిమా ప్రారంభమయ్యే అవకాశం కనిపిస్తోంది. దీంతో భారతీ సినిమా వరల్డ్‌లో మరో రేంజ్‌కు వెళ్ళిపోతుందన్నమాట.