తెలుగు .. తమిళ భాషల్లో అగ్రనటిగా ఒకప్పుడు వెలుగొందిన నటి మీనా. ఈ రెండు భాషలలోను అగ్రకథానాయకులతో కలిసి ప్రేక్షకులను ఆకట్టుకున్న చేప కళ్ల మీనా, ఈ మధ్యనే సెకండ్ ఇన్నింగ్స్‌ను ప్రారంభించింది. హీరోయిన్‌గానే కాకుండా నిర్మాతగాను మారడానికి ఆమె రంగాన్ని సిద్ధం చేసుకుంటోంది. సొంత బ్యానర్‌ను ఏర్పాటు చేసి తెలుగు.. తమిళ భాషల్లో సినిమాలను నిర్మించాలనే ఆలోచనలో పడిందట.
ఇప్పటికే తమిళ తెలుగు ఇండస్ట్రీలకు సంబంధించిన హీరోలను సంప్రదించినట్లు ఫిలిం వర్గాలు అంటున్నాయి. ఇందులో భాగంగానే తెలుగులో మహేష్‌తో ఓ పెద్ద సినిమా తీసే ఆలోచనలో ఉందట. తాజాగా ఈమె మీడియాతో మాట్లాడుతూ.. భవిష్యత్తులో ప్రొడక్షన్ కంపెనీ పెట్టి కమల్ హాసన్, మహేష్ బాబు వంటి సూపర్ స్టార్లతో సినిమాలు చేయాలని కోరుకుంటున్నాను అంటూ ప్రకటించింది.
ప్రస్తుతం మహేష్ బాబు శ్రీకాంత్ అడ్డాల దర్శకత్వంలో నటించిన 'బ్రహ్మోత్సవం' విడుదలై సూపర్ హిట్‌ని సొంతం చేసుకుంది. ఈ చిత్రం తర్వాత మహేష్ తదుపరి చిత్రం ఎవరితో చేస్తారని సినీవర్గాలతో పాటు ఇటు అభిమానులు కూడా ఆసక్తిగా ఎదురుచూస్తున్నారు. కాగా తాజా సమాచారం ఏంటంటే తమిళ క్రేజీ దర్శకుడు ఏ ఆర్ మురుగదాస్ దర్శకత్వంలో సామజిక నేపథ్యంలో సాగే చిత్రం చేయడానికి ప్రిన్స్ రెడీ అవుతున్నాడట.
ఆ తర్వాత మాటల మాంత్రికుడు త్రివిక్రమ్, పూరి జగన్నాథ్‌లతో ప్రాజె‌క్ట్ చేయడానికి మహేష్ పక్కా ప్రణాళికలు వేసుకుంటున్నాడు. కమల్ కూడా శభాష్ నాయుడు సినిమా షూటింగ్‌లో బిజీ బిజీగా ఉన్నాడు. ఆ తర్వాత కూడా మరో రెండు సినిమాలను వరుసగా లైన్‌లో పెట్టుకున్నాడు. మరి మీనా ఈ ప్రాజెక్ట్‌లు పూర్తయ్యేవరకు వేచియుంటుందో లేక వేరే హీరోలతో నిర్మాణం మొదలెడుతుందో చూడాలి.