ముకుంద, లోఫ‌ర్, కంచె, ఫిదా, తొలిప్రేమ... ఇలా వైవిధ్య‌మైన చిత్రాలు ఎంచుకుంటూ కెరీర్లో దూసుకెళుతున్న మెగా హీరో వరుణ్ తేజ్. తాజాగా వరుణ్ తేజ్ అంత‌రిక్షం అనే డిఫ‌రెంట్ మూవీ చేస్తున్నాడు. ఈ సినిమాతో పాటు వరుణ్ తేజ్ విక్ట‌రీ వెంక‌టేష్‌తో క‌లిసి ఎఫ్ 2 సినిమా చేస్తున్నాడు. అంత‌రిక్షం డిసెంబ‌ర్ 21న రిలీజ్ అవుతుంటే.. ఎఫ్ 2 సినిమా సంక్రాంతికి ప్రేక్ష‌కుల ముందుకు రానుంది. ఇదిలా ఉంటే... వరుణ్ తేజ్ విలన్గా న‌టించాల‌నుకుంటున్నాడ‌ట.
అవును.. ఇది నిజంగా నిజం. ఇంత‌కీ విష‌యం ఏంటంటే... ఆ మధ్య తమిళంలో సిద్ధార్థ్ హీరోగా బాబీ సింహా విలన్గా వచ్చిన జిగర్తాండా భారీ విజయాన్ని సొంతం చేసుకుంది. దాంతో ఈ సినిమా తెలుగు రీమేక్ హక్కులను దిల్ రాజు సొంతం చేసుకున్నారు. ఈ సినిమాలో విలన్ పాత్ర కోసం వరుణ్ తేజ్ అయితే బాగుంటాడని భావిస్తున్నారట. ఆయనను సంప్రదించే దిశగా ప్రయత్నాలు జరుగుతున్నాయని అంటున్నారు.
తమిళంలో విలన్ పాత్ర చేసిన బాబీసింహాకి ఆ సినిమా మంచి పేరు తెచ్చిపెట్టింది. అది దృష్టిలో పెట్టుకుని వరుణ్ తేజ్ ఓకే అంటాడో లేక నో అంటాడో తెలియాలంటే కొన్ని రోజులు వెయిట్ చేయాల్సిందే.