మెగాస్టార్ చిరంజీవి ఇంట్లో పెళ్లి సందడి ప్రారంభమైంది. చిరంజీవి చిన్న కుమార్తె శ్రీజ వివాహం త్వరలో జరగనుంది. ఈ పెళ్లిసందడి పనులు పసుపు కుంకుమ వేడుకతో గురువారమే ప్రారంభమైనట్టు సినీ వర్గాల సమాచారం. అయితే, మెగా ఫ్యామిలీ నుంచి ఈ వివాహానికి సంబంధించిన ఒక ప్రకటన అధికారికంగా వెలువడాల్సి వుంది.
ప్రస్తుతం యూఎస్‌లో నివసిస్తున్న శ్రీజ.. అక్కడే పారిశ్రామికవేత్తగా స్థిరపడిన చిత్తూరుకు చెందిన ఎన్ఆర్ఐతో ఆమె వివాహం జరుగనుంది. ఈ వరుడి కుటుంబం చిరంజీవి కుటుంబానికి సన్నిహితమైనదని చెబుతున్నారు. కొన్ని రోజుల క్రితమే అత్యంత సన్నిహితుల మధ్య వీరి నిశ్చితార్థం జరిగినట్లు సమాచారం.
ఈ సందర్భంగా ఏర్పాటు చేసిన ప్రత్యేక విందులో పవన్ కల్యాణ్ సహా 'మెగా' కుటుంబం వరుడి కుటుంబసభ్యులను కలిసారని, మార్చి చివరి వారంలో ఈ వివాహం జరుగుతుందని సినీ వర్గాల ద్వారా తెలుస్తోంది. కాగా, హైదరాబాద్‌కు చెందిన శిరీష్ భరద్వాజ్ను శ్రీజ గతంలో ప్రేమ వివాహం చేసుకుంది. అనంతరం చోటుచేసుకున్న పరిణామాల నేపథ్యంలో శిరీష్‌తో విడాకులు తీసుకున్న విషయంతెలిసిందే. కాగా, శ్రీజ - శిరీష్ భరద్వాజ్‌లకు ఓ సంతానం కూడా ఉంది.