కాయ కష్టాన్ని మరచిపోయేలా కడుపుబ్బ నవ్విస్తున్న మమ్మల్ని కొడతారా అంటూ టాలీవుడ్ చిత్ర పరిశ్రమకు చెందిన కమెడియన్స్ మండిపడుతున్నారు. తమపై దాడి చేసేవారు నిజంగానే మనుషులేనా అని వారు ప్రశ్నిస్తున్నారు. ఇలాంటి వారికి సిగ్గు లేదని ఆగ్రహం వ్యక్తం చేస్తున్నారు.
జబర్దస్త్ వేణుపై దాడిని నిరసిస్తూ జబర్దస్త్ టీమ్ తో పాటు టీవీ, సినీ ఆర్టిస్టులు సోమవారం నిరసన తెలిపారు. ఫిల్మ్ ఛాంబర్ నుంచి బంజారాహిల్స్ పోలీస్ స్టేషన్ వరకూ ర్యాలీ చేపట్టారు. తమపై జరిగిన దాడిని నిరసిస్తూ జబర్దస్త్ టీమ్ తో పాటు టీవీ, సినీ ఆర్టిస్ట్ లు...ఫిల్మ్ ఛాంబర్ వద్ద ఆందోళనకు దిగారు. అనంతరం ఈ ఘటనపై ఫిల్మ్ ఛాంబర్ సెక్రటరీకి వినతి పత్రం సమర్పించారు.
అనంతరం నటుడు, జబర్దస్త్ న్యాయ నిర్ణేత నాగబాబు మాట్లాడుతూ రెండేళ్లుగా నవ్వులు పండిస్తున్న నటులను కొట్టడం అమానుషమన్నారు. స్క్రిప్టులో ఏదైనా తేడా ఉండే కోర్టులకెళ్లాలని ఆయన సలహా ఇచ్చారు. ఏ విపత్తు వచ్చినా కమెడియన్స్ గా తమ వంతు సాయంగా ముందుంటున్నామని, అలాంటిది తమపై దాడి చేయటం దారుణమని ధన్ రాజ్ ఆవేదన వ్యక్తం చేశాడు. ఇలాంటి వారికి సిగ్గుందా లేదా అని ఆయన ఆగ్రహం వ్యక్తం చేశారు.
కాగా ఈటీవీలో ప్రసారమౌతున్న 'జబర్దస్త్' షో ఫేం వేణుపై గౌడ కులస్తులు ఆదివారం ఉదయం దాడి చేసిన విషయం తెలిసిందే. ఈనెల 18న ప్రసారమైన జబర్దస్త్ కార్యక్రమంలో కల్లువృత్తిని, గౌడ మహిళలను అవమానించే విధంగా స్క్రిఫ్ట్‌ను ప్రదర్శించారని ఆరోపిస్తూ ఉస్మానియా విశ్వవిద్యాలయానికి చెందిన గౌడ విద్యార్థి సంఘం నాయకులు ఫిలింనగర్‌లోని అయ్యప్ప ఆలయానికి వచ్చిన వేణును చుట్టుముట్టి క్షమాపణ చెప్పాలని డిమాండ్ చేశారు. కేవలం కామెడీ కోసమే ఆ స్క్రిప్ట్ తయారు చేశానని, ఒక కులాన్ని కించపరిచే ఉద్దేశం తనకు లేదని అతను చెప్తుండగానే వారు దాడి చేశారు.
జబర్దస్త్ టీమ్, ఈటీవీ యాజమాన్యంపై చర్యలు తీసుకోవాలని పోలీసులను కోరారు. దీంతో రెండు గంటలపాటు ఫిలించాంబర్ వద్ద హైడ్రామా చోటు చేసుకుంది. వేణును ఆస్పత్రికి తరలిస్తున్న సమయంలో కూడా గౌడ విద్యార్థులు అడ్డుపడి క్షమాపణ చెప్పాలని డిమాండ్ చేశారు. పోలీసులు రంగప్రవేశం చేసి పరిస్థితిని అదుపులోకి తీసుకొచ్చారు.