'గబ్బర్‌సింగ్‌, బలుపు, ఎవడు, రేసుగుర్రం' వంటి బ్లాక్‌బస్టర్స్‌తో హీరోయిన్ల రేసులో యమ స్పీడ్‌తో దూసుకుపోతూ.. ప్రస్తుతం 'ఆగడు' సినిమా కోసం మహేష్‌ బాబుతో ఖతర్నాక్‌ ఐటం సాంగ్‌ చేస్తున్న శ్రుతిహాసన్‌ హిందీలో నటించిన 'డి-డే' అనే యాక్షన్‌ ఎంటర్‌టైనర్‌ 'గెలుపుగుర్రం' పేరుతో తెలుగులో అనువాదమవుతుండడం తెలిసిందే. ఈ చిత్రంలో శ్రుతిహాసన్‌ వేశ్యగా నటించి ఉండడం విశేషం. సి.ఆర్‌.రాజన్‌ సమర్పణలో.. 'డర్‌ సినిమా' మరియు 'సురేష్‌ సినిమా' బ్యానర్స్‌పై సురేష్‌ దూడల ఈ చిత్రాన్ని తెలుగులో నిర్మిస్తున్నారు.
డ్రగ్స్‌ మరియు మాఫియా నేపధ్యంలో.. నిఖిల్‌ అద్వాని దర్శకత్వంలో రూపొంది.. హిందీలో ఘన విజయం సాధించిన ఈ చిత్రంలో అర్జున్‌ రాంపాల్‌, ఇర్ఫాన్‌ఖాన్‌, రిషికపూర్‌, అనిల్‌కపూర్‌, నాజర్‌, హుమా ఖురేషి వంటి హేమాహేమీలు ఇతర ముఖ్యపాత్రలు పోషించారు. 'కొంచెం ఇష్టం-కొంచెం కష్టం, విశ్వరూపం' చిత్రాలకు సంగీతాన్ని అందించి.. తెలుగు ప్రేక్షకులకు సుపరిచితులైన సంగీత త్రయం 'శంకర్‌-ఎహసాన్‌-లాయ్‌' స్వర సారథ్యం వహించిన 'గెలుపుగుర్రం' ఈనెల 11న ప్రేక్షకుల ముందుకు రానుంది.
ఈ సందర్భంగా 'గెలుపుగుర్రం' నిర్మాత సురేష్‌ దూడల మాట్లాడుతూ.. ''వేశ్య పాత్రలో చాలా బోల్డ్‌గా శ్రుతిహాసన్‌ యాక్ట్‌ చేసిన హాట్‌ సీన్స్‌ 'గెలుపు గుర్రం' చిత్రానికి ప్రధాన ఆకర్షణగా నిలుస్తాయి. తెలుగు ప్రేక్షకులకు సుపరిచితులైన ప్రముఖ నటులు నాజర్‌ ఈ చిత్రంలో ఓ ప్రధాన పాత్ర పోషించారు. 'రేసుగుర్రం' అనంతరం 'గెలుపుగుర్రం'పై వస్తున్న శ్రుతిహాసన్‌ను ప్రేక్షకులు ఆదరిస్తారనే నమ్మకం మాకుంది. ఈనెల 11న ఈ చిత్రాన్ని ప్రేక్షకుల ముందుకు తీసుకువచ్చేందుకు సన్నాహాలు చేస్తున్నాం' అన్నారు!!