పవన్ కళ్యాణ్ తనయుడు అకీరా నందన్ 'ఇష్క్ వాలా లవ్' అనే మారఠీ చిత్రంలో వాళ్ల అమ్మ రేణు దేశాయ్ దర్శకత్వంలో తెరకెక్కుతున్న చిత్రంలో నటిస్తున్న సంగతి తెలిసిన విషయమే. తెలుగులో కూడా విడుదల కాబోతున్న ఈ చిత్రంలోని తన పాత్రకు అకీరా నందన్ డబ్బింగ్ పని పూర్తి చేసేశాడట. రేణు దేశాయ్ అకీరా నందన్ పాత్రపై ప్రత్యేక దృష్టి పెట్టిందట. ఇదిలావుంటే పవన్ కళ్యాణ్ పేరును రేణు తెగ వాడుకుంటోందని ఇటీవల ప్రచారం జరుగుతోంది.
తన మాజీ భర్త పవన్ కళ్యాణ్ పేరును వాడుకుని ఫేమస్ అవటానికి ప్రయత్నిస్తున్నానంటూ సాగుతున్న ప్రచారంపై రేణు దేశాయ్ మండిపడింది. హీరో పవన్ కళ్యాణ్ తో విడిపోయినా... అతని పేరు ఉపయోగించుకోవటంపై వస్తున్న మెసేజ్ లపై ఆమె తన ట్విట్టర్ లో ఘాటుగా స్పందించింది.
దీనిపై ఆమె స్పందిస్తూ.. పవన్ కళ్యాణ్ ను పెళ్లాడక ముందు తాను ఫేమస్ మోడల్, నటి అనే విషయాన్ని గుర్తు చేసింది. 'పవన్ గారు ఈజ్ వెరీ ప్రౌడ్ ఆఫ్ మీ' అన్న ఆమె గత ఏడాది ఏ ఒక్కరి సాయం, మద్దతు లేకుండా ఓ హిట్ సినిమా తీశానని తెలిపింది. ఇకనైనా ఈ విషయంలో అతిగా ఆలోచించే బుర్రలు ఇకనైనా ఆపాలని సూచించింది. ఆ ఎనర్జీని ఏదైనా సోషల్ వర్క్ కు ఉపయోగిస్తే మంచిదని రేణు సలహా కూడా ఇచ్చింది.
గతంలో కూడా రేణు దేశాయ్ కి పవన్ అభిమానులు ఆమెను అవమానించే విధంగా మెసేజ్ లు పోస్ట్ చేశారు. ఆ మెసేజ్ లపై స్పందించిన ఆమె తన ఫేస్ బుక్ ద్వారా సమాధానం ఇచ్చింది. 'ఇలాంటి మెసేజ్ లు పంపించడం సరికాదు. ఇది పవన్ కి కూడా నచ్చదు. నేను ఈ రోజు నుంచి నా ఇన్ బ్యాక్స్ ఆప్షన్ ని స్విచ్ఛాప్ చేస్తున్నాను. సెలబ్రెటీస్ కి కూడా పర్సనల్ లైఫ్ ఉంటుంది. వారిని ఈ విధంగా వేధించడం తగదు. పవన్ కళ్యాణ్ మీద ఎంత అభిమానం ఉన్నప్పటికీ, మిగతా వారి ఇబ్బందులను కూడా ఆలోచించాలి' అని పేర్కొంది.
కాగా, అకిరా ఫిల్మ్స్ బ్యానర్ స్థాపించిన రేణు దేశాయ్ నిర్మాతగా మారి మరాఠీలో సినిమాలు నిర్మిస్తున్న సంగతి తెలిసిందే. తొలి ప్రయత్నంగా రేణు దేశాయ్ నిర్మించిన 'మంగలాష్ తక్ వన్స్ మోర్' సినిమా విజయం సాధించింది.