భారత ప్రధానమంత్రి నరేంద్ర మోడీ స్వదేశీ ప్రచారానికి టాలీవుడ్ టాప్ డైరెక్టర్ రాజమౌళి మద్దతు ప్రకటించారు. నిజానికి చైనా వస్తువులు భారత్‌ను ముంచెత్తుతున్నాయని, దీంతో, చైనీయులు లాభపడుతున్నారని ప్రధాని మోడీ భావిస్తున్నారు. తత్ఫలితంగా భారతీయ వ్యాపారులు నష్టాలు చవిచూస్తున్నారని, ఈ పరిస్థితిని అరికట్టాలని మోడీ సోషల్ మీడియా ద్వారా పిలుపునిచ్చారు. భారతీయులంతా స్వదేశీ తయారీ వస్తువులనే కొనాలని, స్థానిక తయారీదారులను ప్రోత్సహించి, భారత ఆర్థిక ప్రగతికి తోడ్పడాలని ప్రధాని పిలుపునిచ్చారు.
ఈ పిలుపుపై రాజమౌళి స్పందించారు. ప్రధానమంత్రి నరేంద్ర మోడీ చేపట్టిన 'స్వదేశీ' ప్రచారానికి మద్దతు పలికారు. ఈ మేరకు మోడీ సందేశాన్ని తన ఫేస్ బుక్ అకౌంట్ ద్వారా షేర్ చేశారు. 'స్ప్రెడ్ ద వర్డ్' పేరిట ఈ దర్శకధీరుడు చేసిన షేర్‌కు లైక్స్ వెల్లువెత్తాయి. వాస్తవానికి సోషల్ నెట్వర్కింగ్ సైట్లలో సినిమా విషయాల కంటే, సామాజిక అంశాలపైనే రాజమౌళి ఎక్కువగా స్పందిస్తుంటారు.