జూనియర్ ఎన్టీఆర్, కాజల్, పూరి జగన్నాథ్‌ కాంబోలో తెరకెక్కుతున్న చిత్రం ‘టెంపర్’ ఆడియోను హైదరాబాద్ లోనే విడుదల చేస్తామని చిత్ర నిర్మాత బండ్ల గణేశ్ స్పష్టం చేశారు. అందుకు తగిన విధంగా సన్నాహాలు చేస్తున్నట్టు ఆయన వెల్లడించారు.
అయితే కొద్ది రోజులుగా ఈ సినిమా ఆడియో వేడుకను జూనియర్ ఎన్టీఆర్... తాత నందమూరి తారక రామారావు స్వగ్రామం కృష్ణాజిల్లా నిమ్మకూరులో నిర్వహిస్తున్నట్లు కథనాలు వెలువడిన విషయం తెలిసిందే. అయితే ఆ పుకార్లను బండ్ల గణేశ్ కొట్టిపారేశారు.
టెంపర్ ఆడియోను హైదరాబాద్ లోనే రిలీజ్ చేసే పనిలో ఉన్నామన్నారు. డిసెంబర్ రెండోవారంలో పాటల్ని విడుదల చేసి, సంక్రాంతి కానుకగా జనవరి 9న సినిమాను విడుదల చేస్తామన్నారు. ఈ సినిమాలో యన్టీఆర్ సరసన కాజల్ అగర్వాల్ హీరోయిన్ గా నటిస్తోంది. ఈ చిత్రం ఫస్ట్‌లుక్‌ని గురువారం విడుదల చేసిన విషయం తెలిసిందే.