ప్రముఖ హాస్యనటుడు ఎంఎస్ నారాయణ ఆరోగ్య పరిస్థితి విషమంగానే ఉన్నట్లు కిమ్స్ వైద్యులు తెలిపారు. దీనిపై గురువారం వారు హెల్త్ బులెటిన్ విడుదల చేస్తూ, ఎంఎస్ ఆరోగ్య పరిస్థితి విషమంగా ఉండటంతో ఆయనకు వెంటిలేటర్లు అమర్చినట్లు చెప్పారు. డయాలసిస్ కొనసాగుతుందని పేర్కొన్నారు.
కాగా ఎంఎస్ నారాయణ మరణించారంటూ ఈ ఉదయం కొన్ని తెలుగు ఎలక్ట్రానిక్ ఛానల్స్ హడావుడి సృష్టించిన నేపధ్యంలో ఆ వార్తను ఆయన కుమారుడు విక్రమ్ ఖండించారు. మొన్న సంక్రాంతికి సొంతూరు వెళ్లిన ఎమ్మెస్ ఫుడ్ పాయిజన్ కారణంగా అనారోగ్యం బారిన పడ్డారు. ప్రస్తుతం ఆయనకు మాదాపూర్ కిమ్స్ లో చికిత్స అందిస్తున్నారు.