చిత్రపరిశ్రమ తరలిపోవడం అంత సులభం కాదు : దాసరి

రాష్ట్ర విభజన నేపథ్యంలో తెలుగు చిత్ర పరిశ్రమ హైదరాబాద్ నుంచి సీమాంధ్ర ప్రాంతానికి తరలి వెళ్లడం అంత సులభం కాదని ప్రముఖ దర్శకుడు, నిర్మాత దాసరి నారాయణ రావు అభిప్రాయపడ్డారు. ఆయన శుక్రవారం బెజవాడ కనకదుర్గమ్మను దర్శించుకున్నారు. ఈ సందర్భంగా ఆయన మాట్లాడుతూ.. రాష్ట్రం విడిపోయినా సినీ పరిశ్రమ విషయంలో ఎటువంటి మార్పు జరిగే అవకాశం లేదన్నారు. 

రాష్ట్ర విభజనతో తెలుగు సినీ పరిశ్రమ హైదరాబాద్ నుంచి తరలిరావడం సులభం కాదన్నారు. తెలంగాణ, ఆంధ్రప్రదేశ్‌లలో కూడా తెలుగు భాషే కావడం వల్ల సినీ రంగానికి ఇబ్బందులు ఉండవన్నారు. సినీ పరిశ్రమలో రెండు అసోసియేషన్లు ఉన్నా ఇబ్బంది లేదని, రాష్ట్రం విడిపోవడంతో సహజంగానే రెండు అసోసియేషన్లు ఏర్పడతాయన్నారు ఇరుప్రాంతాల వారు కూడా తెలుగు సినీ పరిశ్రమ అభివృద్ధికి దోహదం చేస్తారని చెప్పారు.