బిగ్ బాస్ ఫేమ్, ప్రముఖ యూట్యూబర్ సరయును తెలంగాణ రాష్ట్ర పోలీసులు అరెస్టు చేశారు. ఈమెపై సిరిసిల్ల విశ్వహిందూ పరిషత్ అధ్యక్షుడు చేపూరి అశోక్ ఇచ్చిన ఫిర్యాదు మేరకు కేసు నమోదు చేసిన పోలీసులు ఆమెను సోమవారం రాత్రి అదుపులోకి తీసుకున్నారు.
ఈ వివరాలను పరిశీలిస్తే, ఇటీవల సిరిసిల్లలో కొత్తగా నిర్మించిన ఓ హోటల్ ప్రారంభోత్సవానికి సరయుతో పాటు ఆమె స్నేహితులు వచ్చారు. ఇందుకోసం ఆమె ఒక వాణిజ్య ప్రకటనలో నటించారు. ఇది జనవరి 25వ తేదీన ప్రసారమైంది.
ఈ ప్రకటనలో సరయు, ఆమె స్నేహితులు మద్యం సేవించి, గణపతి బప్పా మోరియా కోట్స్‌తో కూడిన బ్యాండ్‌లను ధరించారు. ఈ ప్రకటన హిందూ మతం, మహిళల మనోభావాలను దెబ్బతీసేలా ఉందని సిరిసిల్ల వీహెచ్‌పీ అధ్యక్షుడు అశోక్ సిరిసిల్లలో ఫిర్యాదు చేశారు. అనంతరం కేసు బంజారాహిల్స్‌ పోలీస్‌ స్టేషన్‌కు బదిలీ అయింది. దీంతో రంగంలోకి దిగిన పోలీసులు ఆమెను అరెస్టు చేశారు.