అసదుద్దీన్ ఉదార స్వభావం... అలా చేసి పూజారి ప్రాణాలు రక్షించారు..

హైదరాబాద్ ఎంపీ, ఎంఐఎం అధినేత అసదుద్దీన్ ఓవైసీని పక్కా హిందూ ద్వేషిగా చాలా మంది భావిస్తుంటారు. కానీ, ఆయనలో చాలా ఉదారస్వభావం ఉందని మరోమారు నిరూపించారు. కరోనా వైరస్ బారినపడి ప్రాణాపాయ స్థితిలో ఉన్న ఓ హిందూ ఆలయ పూజారికి ఆస్పత్రిలో ఓ పడక ఇప్పించి అందరి మనస్సులను గెలుచుకున్నారు. 

తాజా వెలుగులోకి వచ్చిన ఈ వివరాలను పరిసీలిస్తే, హైదరాబాద్ పాతబస్తీలోని ఓ ఆలయం ఉంది. ఇక్కడ 75 ఏళ్ల పూజారి పనిచేస్తున్నారు. ఈయనకు గత శనివారం కరోనా వైరస్ సోకింది. 

అప్పటి నుంచి ఆయన ఐసోలేషన్‌లో ఉన్నారు. ఈ క్రమంలో గురువారం కొంత అస్వస్థతకు గురయ్యారు. దీంతో అప్రమత్తమైన కుటుంబ సభ్యులు ఆయనను ప్రైవేటు ఆసుపత్రిలో చేర్పించే ప్రయత్నం చేశారు.

అయితే, ఎక్కడా బెడ్స్ అందుబాటులో లేకపోవడంతో వారిలో ఆందోళన మరింత పెరిగింది. ఈ క్రమంలో స్థానిక మజ్లిస్ నేత సాయంతో అసదుద్దీన్‌కు పరిస్థితి వివరించారు. ఆ వెంటనే స్పందించిన అసద్ శాలిబండలోని ఓ ప్రైవేటు ఆసుపత్రి యాజమాన్యంతో మాట్లాడి పూజారికి బెడ్ ఇప్పించి ఉదారత చాటుకున్నారు. దీంతో బాధిత కుటుంబసభ్యులు ఆయనకు కృతజ్ఞతలు తెలిపారు.