Telangana Techie: అమేజాన్‌లో అప్లైడ్ సైంటిస్ట్‌గా తెలంగాణ అబ్బాయి.. రూ.2కోట్ల ప్యాకేజీ

Telangana Boy

తెలంగాణకు చెందిన అర్బాజ్ ఖురేషి అనే యువకుడు గ్లోబల్ ఇ-కామర్స్ దిగ్గజం అమెజాన్‌లో రూ.2 కోట్ల వార్షిక వేతన ప్యాకేజీతో ప్రతిష్టాత్మకమైన ఉద్యోగాన్ని పొందాడు. వికారాబాద్ జిల్లా బొమ్రాస్‌పేట మండలం తుంకిమెట్ట గ్రామానికి చెందిన ఆయన అమెజాన్‌లో అప్లైడ్ సైంటిస్ట్‌గా నియమితులై విధుల్లో చేరనున్నారు. 

ఖురేషి 2019లో ఐఐటీ పాట్నా నుండి కంప్యూటర్ సైన్స్‌లో బిటెక్ పూర్తి చేశాడు. తన మూడవ సంవత్సరంలో, అతను ఫ్రాన్స్‌లోని ప్రఖ్యాత మెషీన్ లెర్నింగ్ నిపుణుడు దియాస్ ఆధ్వర్యంలో మూడు నెలల పాటు ఇంటర్న్‌షిప్ చేశాడు. గ్రాడ్యుయేషన్ తర్వాత, అతను బెంగళూరులోని మైక్రోసాఫ్ట్ రీసెర్చ్‌లో రెండేళ్లపాటు పనిచేశారు. 

అమెరికాలోని మసాచుసెట్స్ విశ్వవిద్యాలయం నుండి ఏఐ మెషిన్ లెర్నింగ్‌లో ఎంఎస్ చదివారు. దానిని గత సంవత్సరం పూర్తి చేశాడు. ప్రస్తుతం ఎక్సైజ్ జాయింట్ కమీషనర్‌గా పనిచేస్తున్న అతని తండ్రి యాసిన్ ఖురేషి తన కుమారుడి అద్భుత విజయం పట్ల హర్షం వ్యక్తం చేశారు.