త్వరలో బీఆర్ఎస్ పార్టీ కాంగ్రెస్‌లో విలీనం: బాంబు పేల్చిన దానం నాగేందర్

త్వరలో బీఆర్ఎస్ పార్టీ కాంగ్రెస్ పార్టీలో విలీనం కాబోతోందని దానం నాగేందర్ బాంబు పేల్చారు. బీఆర్ఎస్ పార్టీ ఎమ్మెల్యేలు కాంగ్రెస్ పార్టీలోకి చేరడం వెనుక కారణాలు లేకపోలేదని ఆయన చెప్పుకొచ్చారు. అక్కడ ఎమ్మెల్యేలకు ఎంతమాత్రం గౌరవం వుండదనీ, కలిసేందుకు అపాయిట్మెంట్ కూడా ఇవ్వరని ఆరోపించారు. అలాంటి బాధలను భరించలేకే ఆ పార్టీ నుంచి ఎమ్మెల్యేలు కాంగ్రెస్ పార్టీ లోకి వస్తున్నారని అన్నారు. భారాసలో మిగిలేది కేవలం నలుగురు ఎమ్మెల్యేలు మాత్రమే అని వెల్లడించారు.

2023 ఎమ్మెల్యే ఎన్నికల్లో ఓడిపోవడం, ఇటీవల జరిగిన ఎంపీ ఎన్నికల్లో ఒక్క సీటు కూడా గెలవకపోవడంతో బీఆర్‌ఎస్ ఇప్పటికే తెలంగాణలో కష్టాల్లో కూరుకుపోయింది. ప్రస్తుతం బీఆర్ఎస్ ఎమ్మెల్యేల వలసలను ఎదుర్కొంటోంది. ఇప్పటికే ఏడుగురు ఎమ్మెల్యేలు వెళ్లిపోయారు. గ్రేటర్ హైదరాబాద్ రీజియన్‌కు చెందిన ఆరుగురు బీఆర్‌ఎస్ ఎమ్మెల్యేలు పార్టీని వీడి కాంగ్రెస్‌లో చేరేందుకు సిద్ధంగా ఉన్నట్లు సమాచారం.

శుక్రవారం సీఎం రేవంత్‌రెడ్డి సమక్షంలో అధికారికంగా కాంగ్రెస్‌లో చేరనున్న రాజేంద్రనగర్ ఎమ్మెల్యే ప్రకాష్ గౌడ్ తొలి అడుగు వేశారు. రాజకీయ మార్పు ఇప్పటికే ఖరారైంది. బీఆర్ఎస్ కష్టాలకు తోడు, జూలై 13న మరో ఐదుగురు ఎమ్మెల్యేలు కాంగ్రెస్ శిబిరంలో చేరనున్నారు. ఉప్పల్ ఎమ్మెల్యే బండారు లక్ష్మా రెడ్డి, ఎల్బీ నగర్ ఎమ్మెల్యే సుధీర్ రెడ్డి, శేరిలింగంపల్లి ఎమ్మెల్యే అరికెపూడి గాంధీ, కూకట్‌పల్లి ఎమ్మెల్యే మాధవరం కృష్ణారావు, కుత్బుల్లాపూర్ ఎమ్మెల్యే వివేకానందగౌడ్ రేపు కాంగ్రెస్‌లోకి మారనున్నట్లు సమాచారం. మొత్తమ్మీద రాబోయే ఐదారు నెలలు లోపుగానే భారాసను పూర్తిగా కాంగ్రెస్ పార్టీలో విలీనం చేయాలని ప్రయత్నాలు సాగుతున్నట్లు తెలుస్తోంది.