బీఎండబ్ల్యూ కారుకు బదులు సొమ్ము ఇస్తారట.. థ్యాంక్స్.. దీపా కర్మాకర్

మాస్టర్ బ్లాస్టర్ సచిన్ టెండూల్కర్ కానుకగా ఇచ్చిన ఖరీదైన బీఎండబ్ల్యూ కారును ఎందుకు తిరిగి ఇచ్చేశానో జిమ్నాస్ట్ దీపా కర్మాకర్ స్పష్టం చేసింది. సచిన్ సర్.. నాకు మీరు ఈ కారును గిఫ్ట్‌గా ఇచ్చారు. అయితే త్

మాస్టర్ బ్లాస్టర్ సచిన్ టెండూల్కర్ కానుకగా ఇచ్చిన ఖరీదైన బీఎండబ్ల్యూ కారును ఎందుకు తిరిగి ఇచ్చేశానో జిమ్నాస్ట్ దీపా కర్మాకర్ స్పష్టం చేసింది. సచిన్ సర్.. నాకు మీరు ఈ కారును గిఫ్ట్‌గా ఇచ్చారు. అయితే త్రిపురలో దీన్ని మెయింటైన్ చేయలేను.. దీనికి బదులు సొమ్ములివ్వడానికి అంగీకరించినందుకు థ్యాంక్స్ అంటూ దీపా ట్వీట్ చేసింది. ఈ కారును సచిన్ చేతులమీదుగా హైదరాబాద్ బ్యాడ్మింటన్ అసోసియేషన్ ప్రెసిడెంట్ చాముండేశ్వరీ నాథ్ అందజేసిన సంగతి తెలిసిందే. 

పీవీ సింధు, సాక్షి మాలిక్, గోపీచంద్‌లకు కూడా ఈ కార్లు గిఫ్ట్‌గా అందాయి. ఈ నేపథ్యంలో దీపా కర్మాకర్ తన వాహనాన్ని వాపస్ చేస్తున్నట్లు ప్రకటించింది. అయితే దాన్ని తిరిగి తీసుకునేందుకు స్పాన్సర్ చాముండేశ్వరీ నాథ్ సుముఖంగా లేరని వార్తలు వచ్చాయి. ఈ నేపథ్యంలో కారుకు బదులు సొమ్ము ఇచ్చేందుకు సచిన్ అంగీకరించినట్లు దీపా ట్వీట్ చేసింది. 

కాగా.. తన ఊరిలో రోడ్లు బాగాలేనందున ఈ కారును వెనక్కు తీసుకుని అందుకు ప్రతిగా తనకు డబ్బివ్వాలని జిమ్నాస్ట్ దీపా కర్మాకర్ కోరినట్టు వార్తలొచ్చాయి. కానీ కారును వెనక్కు తీసుకునేందుకు చాముండేశ్వరీ నాథ్ విముఖత వ్యక్తం చేశారు. ఇంకా దీపా కర్మాకర్ కోసం త్రిపుర రాజధాని అగర్తలాలో బీఎండబ్ల్యూ సర్వీస్ సెంటర్ ను పెట్టించే విషయమై సంస్థ ప్రతినిధులతో మాట్లాడానని చాముండేశ్వరీనాథ్ తెలిపారు. 

ఈ విషయంలో స్పష్టత వచ్చిన తరువాతనే కారును వెనక్కు తీసుకోవాలా? వద్దా? అన్న విషయమై నిర్ణయం తీసుకుంటామన్నారు. కానీ సొమ్ము ఇచ్చేందుకు సచిన్ అంగీకరించడంతో దీపా కారు వ్యవహారం కొలిక్కి వచ్చింది. కాగా, దీపతో పాటు మరో ముగ్గురు ఒలింపిక్ పతక విజేతలకు మాస్టర్ బ్లాస్టర్ సచిన్ చేతుల మీదుగా ఈ లగ్జరీ కార్లను పొందిన సంగతి తెలిసిందే.