ప్రపంచ చెస్ ఛాంపియన్‌షిప్ పోటీలలో నార్వేకు చెందిన మాగ్నస్ కార్ల్‌సన్ గెలుపొందారు. ప్రపంచ చెస్‌లో రారాజుగా వెలుగుతున్న ఆనంద్‌కు 23 ఏళ్ల కార్ల్‌సెన్ వరుసగా రెండోసారి షాకిచ్చి తనకు ఎదురులేదని నిరూపించుకున్నాడు.
డ్రాతో మొదలైన 12 గేమ్‌ల ఈ చాంపియన్‌షిప్ తొలి గేమ్‌లో పాయింట్లను పంచుకున్న ఆనంద్ రెండో గేమ్‌లో అనూహ్యంగా ఓటమిపాలయ్యాడు. అయితే, మూడో గేమ్‌లో ఎదురుదాడికి దిగి విజయం సాధించడంతో స్కోరు సమమైంది.
4, 5 గేమ్స్‌లు డ్రా కాగా, ఆరో గేమ్‌లో గెలిచిన కార్ల్‌సెన్ రెండోసారి ఆధిక్యంలోకి దూసుకెళ్లాడు. ఇక ఏడో గేమ్‌లో ఇద్దరు ఆటగాళ్లు 122 ఎత్తుల వరకు పోరాటాన్ని కొనసాగించారు. ప్రపంచ ఛాంపియన్‌షిప్ చరిత్రలోనే ఇది అతి సుదీర్ఘమైన పోరుగా రికార్డుకెక్కిన ఈ గేమ్ చివరికి డ్రాగా ముగిసింది.
ఆ తర్వాత 8, 9, 10 గేమ్‌ల్లోనూ ఫలితం వెల్లడి కాకపోవడంతో, ఆనంద్‌కు 11వ గేమ్ అత్యంత కీలకంగా మారింది. అత్యంత కీలకమైన 11వ గేమ్‌లో ఛాలెంజర్, భారత గ్రాండ్ మాస్టర్ విశ్వనాథన్ ఆనంద్ ఓటమిపాలు కావడంతో కార్ల్‌సెన్‌కు ఈ కిరీటం మరోసారి దక్కింది.