గృహప్రవేశానికి ఉత్తరాయణం మంచి ముహూర్తకాలమని వాస్తు శాస్త్రజ్ఞులు అంటున్నారు. ఉత్తరాయణంలో మాఘమాసం, ఫాల్గుణం, వైశాఖ మాసాలు గృహ ప్రవేశానికి ఉత్తమమని వారు చెబుతున్నారు. ఇంకా కార్తీక, మృగశిర మాసాలు మధ్యమ ఫలప్రదాలు. మిగిలిన మాసాల్లో నూతన గృహ ప్రవేశం పనికి రాదని వాస్తు శాస్త్రం చెబుతోంది.
సోమ, బుధ, గురు, శుక్రవారాల్లో గృహ ప్రవేశం చేయడం శుభప్రదం. అయితే ఆది, మంగళ వారాలలో గృహ ప్రవేశం చేయడం మంచిది కాదని వాస్తు నిపుణులు అంటున్నారు.
అదేవిధంగా చవితి, నవమి, చతుర్థీ తిథులను విడిచిపెట్టి, పౌర్ణమి, సప్తమి, అష్టమి, దశమి తిథుల్లో గృహప్రవేశం చేయడం ద్వారా ఆ గృహంలో సిరి సంపదలు వెల్లి విరుస్తాయి. ఇంకా.. శుక్ల పక్షము నందు ఏకాదశి, ద్వాదశి, త్రయోదశీలతో పాటు శుక్లపక్ష విదియ, తదియలు కూడా గృహప్రవేశం చేయడానికి మంచి ముహూర్తములని వాస్తు చెబుతోంది.
ఇకపోతే... సింహద్వారాన్ని అనుసరించి కూడా గృహప్రవేశ ముహూర్తాలను నిర్ణయించుకోవచ్చునని వాస్తునిపుణులు అంటున్నారు. ఇందులో భాగంగా.. దక్షిణ సింహద్వారము గల గృహమునకు పాడ్యమి, షష్టి, ఏకాదశి తిథులు మంచివి.
అదేవిధంగా తూర్పు సింహద్వారం కలిగిన గృహానికి పూర్ణ తిథులైన పంచమి, దశమి, పూర్ణిమలు శుభప్రదం కాగా, పశ్చిమ సింహద్వార గృహానికి విదియ, సప్తమి, ద్వాదశీ తిథుల్లో గృహ ప్రవేశం చేయడం మంచిదని వాస్తు శాస్త్రం చెబుతోంది.