డాలస్‌లో పోలీస్ సిబ్బందికి నాట్స్ భోజనం: కరోనాపై ముందుండి పోరాడే వారికి ప్రోత్సాహం

అమెరికాలో కరోనాపై ముందుండి పోరాడుతున్న వారిని ప్రోత్సాహించేందుకు.. ఉత్తర అమెరికా తెలుగుసంఘం నాట్స్ తన వంతు ప్రయత్నాలు చేస్తోంది. తాజాగా నాట్స్ డాలస్ విభాగం నార్త్ రిచర్డ్ హిల్స్ పోలీస్ సిబ్బందికి భోజనం ఏర్పాటు చేసి వారి సేవలను ప్రత్యేకంగా అభినందించింది. నాట్స్ ఉపాధ్యక్షుడు బాపు నూతి చొరవతో స్థానికంగా ఉండే 50 మంది పోలీస్ సిబ్బందికి ఈ మధ్యాహ్న భోజనానికి ఏర్పాట్లు చేసింది.

నాట్స్ సభ్యులే స్వయంగా వెళ్లి.. సిద్ధం చేసిన ఆహారాన్ని స్థానిక పోలీస్ స్టేషన్‌లో అందించారు. నాట్స్ చేసే అనేక స్థానిక కార్యక్రమాలకు గత పదేళ్లుగా స్థానిక పోలీస్ అధికార్లతో బాపు నూతి సంప్రదింపులు జరుపుతూ ఉండేవారు. ఈ అనుబంధంతో నాట్స్ విందును పోలీస్ అధికారులు అనుమతించడం జరిగింది.

పోలీస్ సిబ్బందిని ప్రోత్సాహించేందుకు నాట్స్ ఇలాంటి కార్యక్రమం చేపట్టడం అభినందనీయమని నార్త్ రిచర్డ్ హిల్స్ పోలీస్ చీఫ్ జిమ్మీ పర్డ్యూ అన్నారు. నాట్స్ టీంను ఆయన ప్రశంసించారు. ఇంకా ఈ కార్యక్రమంలో నాట్స్ నాయకులు రాజేంద్ర మాదల, ప్రసాద్ డి వి, కవిత దొడ్డ, శ్రీధర్ న్యాలమడుగుల, శ్రీనివాస్ పాటిబండ్ల, యూత్ వాలంటీర్లు మనోజ్ఞ, రేహాన్ తదితరులు పాల్గొన్నారు.

కరోనాపై పోరాడే ఫ్రంట్లైన్ వర్కర్లను ప్రోత్సాహించేందుకు మరిన్ని కార్యక్రమాలు చేపడతామని నాట్స్ బోర్డ్ ఛైర్మన్ శ్రీధర్ అప్పసాని, నాట్స్ ప్రెసిడెంట్ శ్రీనివాస్ మంచికలపూడి తెలిపారు. నాట్స్ డాలస్ విభాగం ఈ విషయంలో చూపుతున్న చొరవను వారు ప్రశంసించారు.