మాంసాహార ప్రియుల్లో చికెన్ అంటే ఇష్టపడని వారు ఎవరూ ఉండరు. రుచికి రుచి, పోషకాలకు పోషకాలను అందించే మంచి మాంసకృత్తులు కలిగిన ఆహారం. దీంతో కూర, ఫ్రై, బిర్యానీ, పులావ్ ఇలా అనేక రకాల వంటకాలను చేసుకుంటారు. కానీ స్నాక్స్‌లా తినాలంటే మాత్రం చికెన్ పకోడీని ఆస్వాదించి తీరాల్సిందే. దీన్ని ఎలా తయారు చేస్తారో ఓ సారి పరిశీలిద్దాం.
కావల్సిన పదార్థాలు...
బోన్‌లెస్ చికెన్ - 200 గ్రామాలు.
పుదీన, కొత్తిమీర - కట్ట చొప్పున
పచ్చి మిర్చి - 3
అల్లం - వెల్లుల్లి - తగినంత
నిమ్మకాయ - 1
ధనియాల పొడి - చెంచా
పెరుగు - 1 చెంచాలు
శనగపిండి - 1/2 కప్పు.
ఉప్పు - తగినంత
వేయించడానికి సరిపడినంత నూనె.
తయారీ విధానం...
ముందు పుదీన, కొత్తిమీర, పచ్చిమిర్చి, అల్లం, వెల్లుల్లి అన్నింటినీ శుభ్రంగా కడిగి చిన్నచిన్న ముక్కలుగా కత్తిరించి మిక్సీలో వేసి మిశ్రమంగా తయారు చేసుకోవాలి. తర్వాత చికెన్‌ను శుభ్రంగా కడిగి గిన్నెలోకి తీసుకుని అందులో ధనియాల పొడి, గరం మసాలా, ఉప్పు, కారం, పెరుగు, నిమ్మకాయ రసం ముందుగా చేసి పెట్టుకున్న పుదీన మిశ్రమంలో వేసి బాగా కలియ తిప్పాలి. గంటసేపు అయిన తర్వాత చెంచా వేడి నూనె, శనగపిండి కలిపి ఉంచాలి. ఇప్పుడు బాణలిలో నూనె వేసి అందులో శనగపిండి కలిపిన చికెన్‌ను పకోడీల్లా వేయాలి. బంగారు వర్ణంలో వచ్చాక తీస్తే వేడి వేడి చికెన్ పకోడీ రెడీ. అయితే శనగపిండితోపాటు కొద్దిగా మొక్కజొన్న పిండిని కూడా కొంతమంది కలుపుతారు. దీంతో పకోడీలు కొంచెం క్రిస్పీగా మారి.. కర కరలాడతాయి.