టీఆర్ఎస్ పార్టీకి చెందిన ఆదిలాబాద్ జిల్లా మంచిర్యాల శాసనసభ్యుడు అరవింద్ రెడ్డి కాంగ్రెస్ పార్టీలో చేరనున్నారు. ఈ మేరకు ప్రచారం జోరుగా సాగుతోంది. వచ్చే అసెంబ్లీ ఎన్నికల్లో తనకు సీటు ఇస్తామని హామీ ఇస్తే పార్టీలో చేరతానంటూ కాంగ్రెస్ పార్టీ పెద్దలను కలిసి చెప్పినట్టు వెల్లడించారు.
ఇదేవిషయంపై ఆయన శుక్రవారం మీడియాతో మాట్లాడుతూ.. తనతో పాటు.. మరో నలుగురు టీఆర్ఎస్ సభ్యులను కూడా కాంగ్రెస్ పార్టీలోకి తీసుకొస్తానని హామీ ఇచ్చినట్టు చెప్పారు. అంతేకాకుండా, తెలంగాణలో 17 పార్లమెంటు స్థానాలను కాంగ్రెస్ పార్టీ గెలుచుకుంటుందని అరవింద్ రెడ్డి జోస్యం చెప్పారు.
తాను ఢిల్లీకి వెళ్లి కాంగ్రెస్ పెద్దలను కలిసిన మాట వాస్తవమేనని దీనికి కారణం తెలంగాణ ప్రజలంతా కాంగ్రెస్ పక్షాన ఉండటమేనని చెప్పారు. కాంగ్రెస్ పార్టీలో చేరతారన్న ప్రచారం జరుగుతున్న నేపథ్యంలో అరవింద్ రెడ్డి తాజాగా చేసిన వ్యాఖ్యలు ప్రాధాన్యత సంతరించుకున్నాయి.