భూ కేటాయింపు కుంభకోణంలో మధ్యప్రదేశ్ సర్కార్!!

మధ్యప్రదేశ్‌లోని భారతీయ జనతా పార్టీ సర్కారు భూ కేటాయింపు కుంభకోణంలో చిక్కుకుంది. ఆ పార్టీ మాజీ అధ్యక్షుడు కుశభవ్‌ ఠాక్రే స్మారకార్థం ఏర్పాటు చేసిన ట్రస్టుకు చట్ట విరుద్ధంగా భూమి కేటాయింపులు జరిపినట్టు తాజాగా వెలుగులోకి వచ్చింది. సుమారు 60 కోట్ల రూపాయల విలువ చేసే 20 ఎకరాల భూమిని ఈ ట్రస్టుకు ఉదారంగా ఇచ్చినట్టు సమాచారం.

భోపాల్‌ నగర నడిబొడ్డున ఈ 20 ఎకరాల భూమికి సంబంధించిన వివాదాన్ని తాజాగా ఒక న్యూస్ టీవీ ఛానల్ వెలుగులోకి తెచ్చింది. భూమి కేటాయింపులు జరిగిన వైనంపై పూర్తి ఆధారాలతో కూడిన పత్రాలు తమ వద్ద ఉన్నాయని ఈ ఛానల్‌ ప్రకటించింది. నగరం నడిబొడ్డులో ఉన్న ఈ ప్రధాన భూభాగాన్ని ఠాక్రే ట్రస్టుకు కేటాయించడంలో ప్రభుత్వం నిబంధనలను తుంగలో తొక్కిందని ఈ ఛానల్‌ వెల్లడించింది.

ప్రధానంగా ఈ ట్రస్టులో సభ్యులుగా ఆ పార్టీ అగ్రనేతలు అద్వానీ, వెంకయ్య నాయుడులు వంటి వారు ఉండగా, భాజపా ఎంపీ, మాజీ ముఖ్యమంత్రి కైలాస్‌జోషీ కార్యదర్శిగా వ్యవహరిస్తున్నారు. ఈ 20 ఎకరాల భూమిని 2006లో ప్రభుత్వం ఈ ట్రస్టుకు 33 ఏళ్ల పాటు రూ.25 లక్షల నామమాత్రపు లీజుకు కేటాయించింది. అయితే అప్పట్లో ఈ భూమి విలువను జిల్లా కలెక్టర్‌ రూ.4.60 కోట్లుగా అంచనా వేసినట్టు ఆ ఛానల్ కథనం పేర్కొంది.

అంతేకాకుండా, జిల్లా మేజిస్ట్రేట్‌ సిఫార్సు మేరకు ఈ స్థలానికి సంబంధించిన వార్షిక లీజు రూ.27 లక్షలకు బదులుగా కేవలం ఒక్క రూపాయిని మాత్రమే ట్రస్టు చెల్లిస్తోంది. ఈ ప్రతిపాదనలను అత్యంత వేగంగా పరిష్కరించాలని ప్రభుత్వం కోరినట్లు 2004 ఆగస్టు 16న జిల్లా మేజిస్ట్రేట్‌ రాసిన లేఖ వెల్లడిస్తోంది.