యాడ్యూరప్ప అవినీతిపరుడు, సిగ్గులేని సీఎం: దేవెగౌడ

కర్ణాటక ముఖ్యమంత్రి బి.ఎస్. యాడ్యూరప్పపై నిప్పులు చెరిగారు మాజీ ప్రధాని, జనతాదళ్ (సెక్యులర్) అధ్యక్షుడు హెచ్‌.డి. దేవెగౌడ. యాడ్యూరప్ప ఓ అవినీతిపరుడని, సిగ్గులేని ముఖ్యమంత్రిని ఆయన మండిపడ్డారు.

భాజాపా ఇతర రాజకీయ పార్టీల వైపు వేలెత్తి చూపేముందు తమ పార్టీ సభ్యుడు యాడ్యూరప్పపై వస్తున్న వివిధ అవినీతి ఆరోపణల గురించి ఒక్కసారి ఆలోచించుకోవాలని హితవు పలికారు.

" భాజాపాకు ఏమాత్రం సిగ్గున్నా.. చాలా రకాల అవినీతి ఆరోపణలు ఎదుర్కుంటున్న తమ స్వంత ముఖ్యమంత్రి (కర్ణాటక సీఎం యాడ్యూరప్ప)పై ముందుగా చర్యలు తీసుకోవాల"ని గౌడ అన్నారు.

దేశ రాజధానిలో తమ నూతన పార్టీ కార్యాలయాన్ని ప్రారంభించిన సందర్భంగా గౌడ ఈ వ్యాఖ్యలు చేశారు. "ఆ ముఖ్యమంత్రికి బొత్తిగా సిగ్గు లేదు. బంధుప్రీతితో ఇంత అవినీతికి పాల్పడ్డ ముఖ్యమంత్రిని చూడటం నా 60 ఏళ్ల రాజకీయ జీవితంలో ఇదే తొలిసార"ని మాజీ ప్రధాని అన్నారు.