ఫోన్ పోతే చాలా ఇబ్బందులు ఉంటాయి. ఫోన్ పోతే ఇంకో ఫోన్ కొనుక్కోవచ్చు. కానీ అందులో ఉండే సమచారం తిరిగి తీసుకురాలేము కదా. అయితే చైనాలోని ఓ దొంగ ఐఫోన్ కొట్టేసి అందులోని సమాచారాన్ని బాధితుడికి పంపించి మంచిదొంగ అనిపించుకున్నాడు. ఫోన్‌లోని సమచారం పంపించాడు కానీ ఫోన్ మాత్రం తిరిగి పంపించలేదట ఈ దొంగోడు. జిన్హువా వార్తా సంస్థ ఈ కథనాన్ని వెల్లడించింది.
చైనాలోని సెంట్రల్ ప్రావిన్స్ హునన్ కు చెందిన జో బిన్.. షేరింగ్ టాక్సీలో ప్రయాణిస్తూ తన యాపిల్ ఐఫోన్ పోగొట్టుకున్నాడు. తన ఫోన్ చోరీకి గురైందని గుర్తించి దొంగకు ఒక టెక్ట్స్ మెసేజ్ పంపాడు. తన ఫోన్ లో ఉన్న నంబర్ల బ్యాకప్ లేదని, దయచేసి ఐఫోన్ తిరిగిచ్చేయాలని కోరాడు. ఫోన్ తన అడ్రస్ కు పంపాలని అందులో విజ్ఞప్తి చేశాడు.
కొద్దిరోజుల తర్వాత తనకు అందించిన ప్యాకేట్ చూసి జో బిన్ ఆశ్చర్యానికి లోనయ్యాడు. ఫోన్ లో ఉన్న 1000 నంబర్లను చేతితో రాసిన 11 పేజీలు అందులో ఉండడం చూసి అతడు అవాక్కయ్యాడు. అయితే దొంగిలించిన ఐఫోన్ మాత్రం పంపలేదు. ఫోన్ లో సేవ్ చేసిన నంబర్లు, వారి పేర్లు స్వదస్తూరీతో రాశానని జో బిన్ కు సందేశంలో దొంగ పేర్కొన్నాడు.