పాకిస్థాన్ మాజీ ప్రధానమంత్రి, పాకిస్థాన్ పీపుల్స్ పార్టీ అధినేత్రి బెనజీర్ భుట్టో హత్యకు ఆ దేశ ఆర్మీకి చెందిన బ్రిగేడియర్ ఇంటిలోనే కుట్ర జరిగినట్టు ఆ దేశ మీడియా ఒక సంచలన కథనాన్ని ప్రసారం చేసింది. ఆమె హత్యపై తాజాగా జరిపిన దర్యాప్తులో ఒక బ్రిగేడియర్‌తో సహా తొమ్మిది మంది కలిసి కుట్రపన్నినట్టు తేలిందని ది ఎక్స్‌ప్రెస్ ట్రిబ్యూన్ అనే పత్రిక ఒక కథనాన్ని ప్రచురించింది.
ఈ కథనాలపై ఆ దేశ అంతర్గత శాఖామంత్రి రెహ్మాన్ మాలిక్ తక్షణం స్పందించారు. ఇదంతా కట్టుకథగా ఆయన కొట్టిపారేశారు. కాగా, ఈ తాజా దర్యాప్తు మాలిక్ పర్యవేక్షణలోనే జరగడం గమనార్హం. అయితే ప్రాథమిక దర్యాప్తులోని విషయాలను సొంత పార్టీ నేతలకు కూడా తెలియకుండా అత్యంత రహస్యంగా ఉంచినట్టు ఆ పత్రిక పేర్కొంది.
కుట్రపన్నిన తొమ్మిది మందిలో నలుగురు చనిపోయినట్టు తెలుస్తోంది. కాగా, ఈ కథనంపై దర్యాప్తు చేసేందుకు పాక్ ప్రభుత్వం సంయుక్త విచారణ బృందాన్ని నియమించింది. మరోవైపు, దేశంలో చాలామంది ఉగ్రవాదులు చట్టం నుంచి తప్పించుకుంటున్నారని, అందువల్ల ఉగ్రవాద నిరోధక చట్టాన్ని మరింత కఠినతరం చేయాల్సిన అవసరముందని పాక్ ప్రధాని గిలానీ వ్యాఖ్యానించారు.