ఫేస్‌బుక్‌లో మెసేజ్: ప్రేమపెళ్లికి అంగీకరించలేదని ఆత్మహత్య!

FILE

ప్రేమ వివాహానికి ప్రియురాలి తల్లిదండ్రులు అంగీకరించకపోవడంతో మనస్తాపం చెందిన ఓ యువకుడు ఫేస్ బుక్‌లో సందేశం పెట్టి ఆత్మహత్య చేసుకున్నాడు. నెల్లూరు జిల్లా మబ్బుగుంటపాలెం గ్రామానికి చెందిన శ్రీనివాస్, కనకమ్మల కుమారుడు వేణు హైదరాబాద్‌లోని ఓ కాలేజీలో బీటెక్ చదివాడు.

ఈ క్రమంలోనే ఓ అమ్మాయితో ప్రేమలో పడ్డాడు. కుత్బుల్లాపూర్ పరిధిలోని ఎన్ఎల్బీ‌నగర్‌లో తన స్నేహితులతో కలిసి ఉంటున్న వేణు ఆరు నెలలుగా ఉద్యోగ ప్రయత్నాలు కొనసాగిస్తున్నాడు. బుధవారం తన స్నేహితుడు అనిల్ విధి నిర్వహణ ముగించుకుని సాయంత్రం తిరిగి రూమ్‌కి వచ్చి చూసే సరికి వేణు ఫ్యాన్‌కు ఉరి వేసుకుని కనిపించడంతో తీవ్ర ఆందోళనకు గురయ్యాడు.

సమాచారం అందుకున్న పోలీసులు ఈ సంఘటనపై దర్యాప్తు జరుపుతున్నారు. కాగా తన ప్రియురాలి తల్లిదండ్రులు తమ వివాహానికి ఒప్పుకోలేదని, తాను ఆత్మహత్య చేసుకుంటున్నానని వేణు ఫేస్ బుక్‌లో సందేశం పెట్టాడు.