తమ ప్రభుత్వానికి త్వరలో జరుగనున్న ఉప ఎన్నికలు రెఫరెండం కాదని ముఖ్యమంత్రి కిరణ్ కుమార్ రెడ్డి అభిప్రాయపడ్డారు. ఆయన ఆదివారం సీఎం క్యాంపు కార్యాలయంలో మీడియాతో మాట్లాడుతూ.. తమ ప్రభుత్వ పని బాగానే ఉందన్నారు. అయినప్పటికీ.. ఈ ఉప ఎన్నికలు రెఫరెండం కాదన్నారు.
వచ్చే 2014 ఎన్నికలు తమ సర్కార్ పనితీరుకు రెఫరెండంగా తాము భావిస్తామన్నారు. ఉప ఎన్నికల్లో పోటీ చేసే అభ్యర్థుల పేర్లను త్వరలోనే ఖరారు చేస్తామని ఓ ప్రశ్నకు సమాధానం ఇచ్చారు. అన్ని స్థానాల్లో తమ పార్టీ అభ్యర్థులను పోటికి దించుతుందన్నారు.
ఈ ఎన్నికల్లో తాము చేసిన అభివృద్ధి, సంక్షేమ పథకాలతోనే ప్రచారానికి వెళతామన్నారు. 2014లో ముఖ్యమంత్రి ఎవరనేది అధిష్టానం నిర్ణయిస్తుందని పేర్కొన్నారు. కాంగ్రెస్‌లో ప్రజారాజ్యం పార్టీ పూర్తిగా విలీనం కాలేదని వాస్తున్న వార్తల్లో నిజం లేదని స్పష్టం చేశారు. మంత్రి వర్గ స్థానంలో పీఆర్పీ వారికి స్థానం లభిస్తుందన్నారు.
గ్రామీణ ప్రాంతాల్లోని ఆరోగ్య కేంద్రాల్లో కొత్తగా 400 మంది వైద్యులను కాంట్రాక్టు పద్ధతిలో భర్తీ చేస్తామని తెలిపారు. త్వరలో నామినేటేడ్ పోస్టుల భర్తీ ప్రక్రియ చేపడతామన్నారు. విద్యుత్ ఛార్జీల పెంపుదల ఈఆర్‌సీ ఆమోదం ప్రకారమే ఉంటుందని చెప్పారు.