రాష్ట్ర మంత్రివర్గ విస్తరణ అనంతరం కాంగ్రెస్ సీనియర్ నేత జేసీ దివాకర్ రెడ్డి సోనియా గాంధీని కలిశారు. సోమవారం అధినేత్రి సోనియా గాంధీని పార్లమెంటులోని పార్టీ ఆఫీసులో సమావేశమైన సందర్భంలో రాష్ట్ర రాజకీయాలపై చర్చించినట్లు తెలుస్తోంది.
కాంగ్రెస్ పార్టీకి విశ్వసనీయతను కనబరుస్తున్న జేసీకి మంచి భవిష్యత్తు ఉన్నదనీ సోనియా గాంధీ భరోసా ఇచ్చినట్లు తెలిసింది. ఈ సందర్భంగా ఆయనను విలేకరులు ప్రశ్నించారు.
ప్రస్తుత మంత్రివర్గంలో మంత్రి పదవి దక్కలేదు కనుక దానికోసం యత్నిస్తున్నారా...? అని అడిగితే, తనకు అమాత్య పదవి వద్దని సోనియాతో చెప్పినట్లు వెల్లడించారు. ముఖ్యమంత్రి కిరణ్ కుమార్ నేతృత్వంలోని ప్రభుత్వం పూర్తి కాలం కొనసాగుతుందని ధీమా వ్యక్తం చేశారు.