ఉత్తరాదిన... అదీ ఉత్తరప్రదేశ్ అంటేనే అత్యాచారాలకు నెలవైన రాష్ట్రంగా మారిపోతోంది. అమ్మాయిలపై అకృత్యాలు పెచ్చరిల్లిపోతున్నాయి. అత్యాచారం చేసిన వాడిని కఠినంగా శిక్షించాలంటూ ప్రభుత్వాలు నిర్భయ చట్టాలు తెచ్చినా అవి అమలుకు నోచుకుంటున్న దాఖలాలు వుండటంలేదు. ఉత్తరప్రదేశ్ రాష్ట్రంలో ఓ యువతిపై ఓ కామాంధుడు అత్యాచారానికి పాల్పడ్డాడు. ఆపై ఆమెను పెళ్లి చేసుకోవాలంటూ తనకు కట్నంగా రూ.5 లక్షలు ఇవ్వాలంటూ డిమాండ్ పెట్టాడు.
వివరాల్లోకి వెళితే... ఉత్తర్‌ప్రదేశ్‌లోని బండా గ్రామానికి చెందిన తాజ్ అనే యువకుడు అదే గ్రామానికి చెందిన ఓ యువతిపై అత్యాచారం చేశాడు. దాంతో తమ కుమార్తెకు జరిగిన అన్యాయాన్ని ఆమె తల్లిదండ్రులు ఊరి పెద్దల దృష్టికి తీసుకెళ్లారు. దాంతో పెద్దలు ఓ పంచాయతీ చేశారు. అదేమిటంటే... అత్యాచారం చేసిన దానికి కేసులేమీ పెట్టబోమనీ, ఐతే ఆమెను వివాహం చేసుకోవాలని సూచన చేశారు.
పెద్దల ముందు సరేనని తలకాయను ఆడించిన తాజ్.. పెళ్లి రోజు దగ్గరపడేసరికి తన నిజరూపం మరోసారి బయటపెట్టాడు. తనకు రూ. 5 లక్షలు కట్నంగా ఇస్తేనే అమ్మాయి మెడలో తాళి కడతానంటూ కండిషన్ పెట్టాడు. దాంతో చేసేది లేక బాధితురాలి తల్లిదండ్రులు పోలీసులను ఆశ్రయించారు. కేసు నమోదు చేసుకున్న పోలీసులు దర్యాప్తు చేస్తున్నారు.