పోలీసులు ప్రభుత్వం ఖజానా నుంచి నెలవారీ జీతాలు తీసుకుంటున్నప్పటికీ లంచాలు తీసుకోవడం మాత్రం మానడం లేదు. తాజాగా ఉత్తరప్రదేశ్ రాష్ట్రానికి చెందిన ఓ కానిస్టేబుల్ ఓ రైతు నుంచి 5కేజీల బంగాళాదుంపలను లంచంగా తీసుకున్నాడు. ఈ విషయం ఉన్నతాధికారుల దృష్టికి వెళ్లడంతో అతడిపై సస్పెన్షన్ వేటు పడింది.
అయితే ఓ కేసు సెటిల్ చేసేందుకు లంచం డిమాండ్ చేసిన అతడు.. కోడ్ పదంగా 'బంగాళదుంప'ను ఉపయోగించినట్లు ప్రాథమిక దర్యాప్తులో తేలింది. రామ్ కృపాల్ సింగ్ అనే ఎస్ఐ ఈ నిర్వాకానికి పాల్పడ్డాడు. ఎస్ఐ ఫోన్ కాల్‌ను రైతు రికార్డు చేయడంతో ఈ వ్యవహారం వెలుగుచూసింది. ఎస్ఐ ఆడియో వైరల్‌గా మారింది.
కన్నౌజ్ జిల్లా సౌరిఖ్ పోలీస్ స్టేషన్ పరిధిలోని భావల్పూర్ చౌకీలో అతడు విధులు నిర్వహిస్తూ ఈ నిర్వాకానికి పాల్పడ్డాడని, దీంతో అతడిని కన్నౌజ్ ఎస్పీ అమిత్ కుమార్ ఆనంద్ సస్పెండ్ చేస్తూ ఆదేశాలు జారీ చేశారని అధికారులు ప్రకటించారు. ఈ ఘటనలో సదరు ఎస్ఐపై శాఖాపరమైన దర్యాప్తు చేపట్టాలని ఆదేశించినట్టు వెల్లడించారు. కన్నౌజ్ సిటీ సర్కిల్ అధికారి కమలేశ్ కుమార్కు కేసు దర్యాప్తు బాధ్యతలను అప్పగించారు.
కాగా వైరల్ ఆడియోలో ఆ ఎస్ఐ బాధిత రైతుని 5 కిలోల బంగాళాదుంపలు అడగగా.. తాను అన్ని ఇవ్వలేనని రైతు సమాధానం ఇచ్చాడు. దీంతో ఆగ్రహానికి గురైన ఎస్ఐ తన ఉద్దేశాన్ని అర్థమయ్యేలా చెప్పాడు. ఆ రైతు 2 కిలోలు ఇస్తానని అన్నాడు. పోలీసు అధికారి కోపం తెచ్చుకుని తన అసలు డిమాండ్‌ను నొక్కి చెప్పాడు. దీంతో ఫైనల్‌గా 3 కిలోలు తీసుకునేందుకు ఎస్ఐ అంగీకరించాడు. ఈ వీడియో వైరల్ కావడంతో ఎస్ఐ సస్పెండ్‌కు గురయ్యాడు.