ఉత్తరప్రదేశ్ రాష్ట్రంలోని గోరఖ్ పూర్ లో గత అర్థరాత్రి రెండు ఎక్స్ ప్రెస్ రైళ్లు ఎదురెదురుగా ఢీకొన్నాయి. ఈ ప్రమాదంలో తొమ్మిది మంది ప్రయాణికులు దుర్మరణం పాలయ్యారు. మరో 25 మంది వరకు గాయపడ్డారు. క్షతగాత్రులను సమీపంలోని ఆసుపత్రికి తరలించి చికిత్స అందిస్తున్నట్లు రైల్వే శాఖ ఉన్నతాధికారులు వెల్లడించారు. బోగిల మధ్య మరింత ప్రయాణికులు చిక్కుకుని ఉండే అవకాశం ఉందని... ఈ నేపథ్యంలో మృతులు, క్షతగాత్రుల సంఖ్య మరింత పెరిగే అవకాశం ఉందని వారు చెప్పారు.
క్రిషాక్ ఎక్స్ ప్రెస్ రైలు సిగ్నాల్ దాటి వెళ్లి అదే ట్రాక్ పై వస్తున్న బరౌనీ ఎక్స్ ప్రెస్ ను ఢీ కొట్టిందని వారు తెలిపారు. దీంతో బరౌనీ ఎక్స్ ప్రెస్ కు చెందిన 5 జనరల్ బోగీలు పట్టాలు తప్పగా... క్రిషాక్ ఎక్స్ ప్రెస్ రైలులోని పలు కోచ్ లు దెబ్బతిన్నాయని తెలిపారు. కాగా క్రిషాక్ ఎక్స్ ప్రెస్ రైల్ డ్రైవర్లు ఇద్దరు పరారీలో ఉన్నారని చెప్పారు. ఈ ప్రమాద ఘటనపై రైల్వే బోర్డు విచారణకు ఆదేశించినట్లు వెల్లడించారు. ఈ ప్రమాదం కారణంగా గోరఖ్ పూర్ మార్గంలో పలురైళ్ల రాకపోకలను అధికారులు తాత్కాలికంగా రద్దు చేశారు. మరికొన్ని రైళ్లను మాత్రం మరో మార్గంలో మళ్లిస్తున్నారు.