నటికి పెళ్లి ప్రపోజల్, కాదన్నందుకు కత్తితో పొడిచిన ప్రొడ్యూసర్

ఫోటో కర్టెసీ-ఇన్‌స్టాగ్రాం

ప్రేమోన్మాదులు ఈమధ్య కాలంలో ఎక్కువయిపోతున్నారు. తొలుత స్నేహం అంటూ పరిచయం పెంచుకుని ఆ తర్వాత మెల్లిగా సదరు యువతులను తమను పెళ్లాడాలంటూ బలవంతం చేస్తున్నారు. మాట వినకపోతే హత్య చేసేందుకు ఎంతమాత్రం వెనుకాడటంలేదు. తాజాగా ఓ సినీ నిర్మాత ఏకంగా ఓ నటిపై ఘాతుకానికి పాల్పడ్డాడు. 

వివరాల్లోకి వెళితే... బాలీవుడ్ నటి మాల్వీ గత ఏడాది ఓ ప్రొడక్షన్ పని నిమిత్తం నిర్మాత యోగేశ్ కుమార్‌ను కలిశారు. అలా వారి మధ్య పరిచయమయ్యింది. ఆ పరిచయాన్ని అడ్డంపెట్టుకుని ఇటీవలే ఆమె వద్ద పెళ్లి ప్రపోజల్ చేసాడు యోగేశ్. అతడి ప్రపోజల్‌కు నో చెప్పింది మాల్వీ. ఇక అప్పట్నుంచి అతడు ఆమెపై కసి పెంచుకున్నాడు.

బుధవారం రాత్రి మాల్వీ కారులో ఇంటికి వస్తుండగా యోగేశ్ ఆడి కారులో వచ్చి ఆమెతో మాట్లాడే ప్రయత్నం చేసాడు. అందుకు ఆమె నిరాకరించడంతో తనతో తెచ్చుకున్న కత్తితో ఆమె కడుపులో నాలుగుసార్లు పొడిచాడు. దాంతో ఆమె పెద్దపెట్టున కేకలు వేయడంతో చుట్టుపక్కలవారు రావడంతో యోగేశ్ అక్కడ నుంచి పారిపోయాడు. కాగా గాయపడిని మాల్వీని ముంబైలోని కోకిలాబెన్ ఆసుపత్రిలో చికిత్స అందిస్తున్నారు. ఆమె ఆరోగ్య పరిస్థితి నిలకడగా వున్నట్లు వైద్యులు తెలిపారు.

కాగా యోగేశ్ తనకు ఫేస్ బుక్ ద్వారా పరిచయమయ్యాడనీ, తను ఓ నిర్మాతనంటూ పరిచయం చేసుకున్నట్లు మాల్వీ వెల్లడించింది. తన వద్ద పెళ్లి ప్రపోజల్ తీసుకురాగానే అతడిని దూరం పెట్టినట్లు ఆమె చెప్పారు. నిందితుడి కోసం పోలీసులు గాలిస్తున్నారు.