కాంగ్రెస్ నిరంతరం ఏడుస్తున్న బాధితుడిగా మారిపోయిందని కేంద్ర మంత్రి స్మృతి ఇరానీ విమర్శలు గుప్పించారు. అలాగే కాంగ్రెస్ పార్టీ ఉపాధ్యక్షుడు రాహుల్ గాంధీపై కూడా స్మృతి ఇరానీ సెటైర్లు విసిరారు. తానొక నిర్దిష్ట శైలిలో మాట్లాడతానని, రాహుల్ గాంధీ కూడా తననే అనుకరించాడని ఎద్దేవా చేశారు. మొత్తానికి ఆయన తన ప్రసంగాన్ని కాపీ కొట్టారని ఓ టీవీ ఛానల్‌కు ఇచ్చిన ఇంటర్వ్యూలో ఆరోపించారు.
అమేథీలో తను చేసిన ప్రసంగాలనే రాహుల్ ఎంచుకుని అదే శైలిలో మాట్లాడారని స్మృతి ఇరానీ చెప్పారు. ఒకవేళ నిర్ధారణ చేసుకోవాలంటే అమేథీలో తను మాట్లాడిన వీడియోలను పరిశీలించాలన్నారు. రాహుల్ గాంధీ తన అనుకరించడం పొగడ్తగా తీసుకోనని, హాస్యాస్పదంగా ఉందని అభిప్రాయం వ్యక్తం చేశారు. ప్రసంగాలనే కాపీ కొట్టే రాహుల్ గాంధీ.. ప్రభుత్వాన్ని లక్ష్యంగా చేసుకుని ఆరోపణలు చేయడం సరికాదని సూచించారు.