రైల్వే స్టేషన్‌ను చెరోసగం పంచుకుంటున్న 2 రాష్ట్రాలు... ఎక్కడ?

ప్రపంచంలోనే అతిపెద్ద రవాణా వ్యవస్థ కలిగిన సంస్థ భారతీయ రైల్వే. ఈ సంస్థలో వింతలూ విశేషాలకు ఏమాత్రం కొదవలేదని చెప్పొచ్చు. కానీ అవి పెద్దగా బయటకు రావు. కానీ, సాక్షాత్ రైల్వే మంత్రి పియూష్ గోయల్ ఓ వింతైన విషయాన్ని స్వయంగా వెల్లడించారు. అదేంటంటే.. ఓ రైల్వే స్టేషన్‌ను రెండు రాష్ట్రాలు పంచుకుంటున్నాయి. 

అలాంటి రైల్వే స్టేషన్ గుజరాత్ - మహారాష్ట్ర సరిహద్దుల్లో ఉంది. ఈ విషయాన్ని మంత్రి పియూష్ గోయల్ తాజాగా తన ట్విట్టర్ ఖాతాలో వెల్లడించారు. ఈ రైల్వే స్టేషన్ సగం గుజరాత్‌లో మరో సగం మహారాష్ట్ర భూభాగంలో వస్తుంది. దీంతో తాజాగా ఈ విషయం సోషల్ మీడియాలో వైరల్‌ అవుతోంది. 

'దేశంలో రెండు రాష్ట్రాల్లోనూ ఉన్న ఓ రైల్వేస్టేషన్ గురించి తెలుసా? సూరత్‌-భుసావల్ మార్గంలో నవాపూర్ రైల్వే స్టేషన్ ఇది. రెండు రాష్ట్రాల సరిహద్దులు ఈ స్టేషన్ మధ్య నుంచి వెళ్తున్నాయి. 

కాబట్టి ఈ స్టేషన్ సగం గుజరాత్‌లోనూ, సగం మహారాష్ట్రలోనూ ఉంది' అని మంత్రి పియూష్ గోయల్ పేర్కొన్నారు. ఇలాంటి స్టేషన్ ఇదొక్కటే కాదు.. 'భవానీ మండి' రైల్వే స్టేషన్ కూడా ఉది. ఈ రైల్వే స్టేషన్ మధ్యప్రదేశ్ నుంచి రాజస్థాన్‌లోకి విస్తరించి ఉందని ఆయన తన ట్వీట్‌లో పేర్కొన్నారు.